Dy prindër janë vënë nën hetim nga Policia e Tiranës pas kallëzimeve të bëra nga një mësuese dhe një pronare kopshti privat, të cilat pretendojnë se janë fyer dhe denigruar publikisht.
Sipas njoftimit zyrtar të Policisë, një mësuese 50-vjeçare me inicialet I. P. ka kallëzuar në komisariat shtetasin O. Xh., babain e një nxënëseje, duke e akuzuar për fyerje për shkak të detyrës.
Nuk jepen detaje specifike për motivin e konfliktit, por dyshohet se gjithçka ka nisur për arsye të lidhura me procesin mësimor. Materialet i janë referuar Prokurorisë për veprime të mëtejshme.
Ndërkohë, më herët është regjistruar një rast tjetër, një 36-vjeçare me inicialet M. J., pronare e një kopshti privat, ka kallëzuar nënën e një fëmije pasi kjo e fundit ka postuar në rrjete sociale një foto të fëmijës së saj duke pretenduar se ishte përfshirë në një konflikt me një tjetër fëmijë në ambientet e kopshtit.
Sipas kallëzueses, publikimi ka cenuar imazhin e institucionit.
Për të dyja rastet, hetimet janë në fazën paraprake dhe pritet vlerësimi i Prokurorisë për hapat ligjorë në vijim.
