Rëndohet më tej bilanci i masakrës së ndodhur në një shkollë në qytetin Graz të Austrisë, ku një 21-vjeçar hapi zjarr ndaj nxënësve dhe stafit pedagogjik. Sipas të dhënave më të fundit, numri i viktimave ka shkuar në 11 persona, përfshirë edhe autorin e sulmit, i cili u vetëvra në tualetin e shkollës.
Spitali ku po trajtohen të plagosurit njoftoi se një prej tyre, një person i rritur, nuk arriti t’u mbijetojë plagëve të marra, duke e çuar në 11 numrin total të të vdekurve. Një tjetër i plagosur është raportuar në gjendje kritike për jetën.
Mes viktimave edhe një vajzë nga Kosova
Tragjedia ka prekur edhe komunitetin shqiptar në Austri. Mes viktimave është identifikuar edhe një vajzë nga Kosova, L. Bajrami, rreth 15 vjeç, e cila ishte nxënëse në shkollën BORG Dreierschützengasse ku ndodhi sulmi.
Lajmi është konfirmuar nga gazetari Vehbi Haliti, që jeton në Graz. “Fatkeqësisht po them se është e saktë. Është një vajzë e një aktivisti tonë këtu në Graz. Është një tragjedi ndër më të mëdhatë në Austri pas Luftës së Dytë Botërore, sa i përket tragjedive të qëllimshme”, deklaroi Haliti për mediat.
Autori, ish-nxënës i shkollës dhe viktimë e bullizmit
Sipas informacioneve të reja nga hetimet, autori i ngjarjes është 21 vjeç dhe ka qenë më parë nxënës në këtë shkollë, por nuk e kishte përfunduar ciklin e studimeve. Dyshohet se ai ka pasur një histori të gjatë përballjeje me bullizmin, që mund të ketë ndikuar në motivimin për të kryer këtë akt ekstrem.
Hetuesit kanë gjetur një letër të lënë nga autori, por përmbajtja e saj nuk është bërë ende publike. Policia po vijon hetimet për të zbardhur rrethanat dhe motivet e plota të ngjarjes.
Autoritetet vendase kanë ofruar mbështetje psikologjike për familjet e viktimave dhe për nxënësit e mbijetuar. Po ashtu, komuniteti shqiptar në Graz është vënë në lëvizje për të ndihmuar familjen e vajzës nga Kosova që humbi jetën në këtë ngjarje të rëndë.
Kjo është një nga ngjarjet më tragjike në historinë e pasluftës në Austri, duke tronditur jo vetëm vendin, por edhe komunitetet ndërkombëtare që jetojnë aty. Trishtimi dhe dhimbja janë të mëdha, ndërsa hetimet vazhdojnë për të hedhur dritë mbi arsyet e këtij sulmi të përgjakshëm.
