Prokuroria e Posaçme kundër Korrupsionit dhe Krimit të Organizuar ka nisur një procedim penal ndaj ministres aktuale të Arsimit dhe ish-ministres së Shëndetësisë, Ogerta Manastirliu. Kallëzimi është bërë nga SPAK nga deputetja e Partisë Demokratike, Albana Vokshi.
Kjo e fundit e akuzonte ministren për keqmeanxhimin dhe abuzimin me fondet e ndara për pandeminë e koronavirusit. Të njëjtat burime bëjnë me dije se procedimi penal mban numrin “81/2024”, për shpërdorim detyre. Megjithatë deri më tani nuk ka asgjë të konfirmuar zyrtarisht nga ana e SPAK lidhur me çështjen e Manastirliut.
Lidhur me këtë çështje, Manastirliu është thirrur në SPAK në muajin shkurt, por asokohe u shpreh se çështja ishte “sekret hetimor” dhe se nuk mund të jepte më shumë detaje. Por pas Manastirliut, Vokshi shkoi sërish në SPAK për të bërë një kallëzim shtesë për Manastirliun lidhur me tenderat. Demokratja pretendon se nga ana e ministres socialiste janë kryer disa shkelje ligjore si: ‘Shpërdorimi i detyrës’, ‘Shkeljes së barazisë së pjesëmarrësve në tendera apo ankande publike’ lidhur me “tenderat sekretë” që jepeshin në kohën e pandemisë.
“Përmes dy Vendimeve të Këshillit të Ministrave (VKM) konkretisht: VKM Nr. 203, datë 26.02.2020 ‘Për procedurat që përdoren për Lidhjen e Kontratave që Diktohen nga Interesa Thelbësor të Shtetit’ dhe Ndryshimeve te bëra me VKM nr. 242 date 22.03.2020 ‘Për disa shtesa në Vendimin nr. 203’, Këshilli i Ministrave i barazon procedurat dhe kontraktimet për shkak të Covid-19 si Kontraktime Sekrete. Kjo VKM është në kundërshtim me Kushtetutën. Abuzim duhet të konsiderohet edhe fakti se VKM nr. 203 nuk ka përcaktuar përkufizimin e gjendjes, rrethanave, apo rasteve kur kemi të bëjmë me ‘interesa thelbësore të shtetit’, por këto rrethana i ka lënë rast pas rasti në vlerësim të autoriteteve kontraktore. Pra e thënë shkurt, kushtet kur termi ‘interesa thelbësore të shtetit’ nuk ka gjetur një rregullim ligjor, ngelet një situate abstrakte e pa përkufizuar dhe në vlerësimin subjektiv të çdo autoriteti duke rritur riskun për arbitraritet,”-thuhet ndër të tjera në kallëzim.
Ndaj për të dhënë edhe njëherë sqarimet e saj lidhur me çështjen, Manastirliu mund të thirret sërish në SPAK. Ndërsa në qershor, po nga SPAK u thirr edhe Silva Bino, shefja e Departamentit të Epidemiologjisë pranë ISHP-së. Bino dëshmoi për gati 1 orë dëshmoi para prokurorëve të SPAK në lidhje me një tender të ISHP-së, në cilësinë e personit që ka dijeni pasi ka qenë dhe drejtoreshë e këtij institucioni gjatë periudhës së pandemisë.
