Kryeministrja e Italisë, Giorgia Meloni, në një intervistë për Corriere della Sera ka deklaruar se nuk ka marrë asnjë vendim për të cilin duhet të ndihet e turpëruar, megjithëse pranon se ka pasur gabime.
Ajo theksoi se marrëveshja me Shqipërinë është një leksion për Europën dhe synon të japi një goditje të fortë organizatave kriminale që shfrytëzojnë emigrantët.
Ekzekutivi ka bërë zgjedhje të sakta lidhur me çështjen e emigracionit dhe protokolli i nënshkruar me Shqipërinë është një prej tyre. Është një zgjidhje shumë novatore, e cila po shërben si një leksion jo vetëm në Europë, por edhe më gjerë, pasi është e qartë se synon t’i japë një goditje fatale organizatave kriminale që spekulojnë me emigrantët për të majmur fitimet e tyre”, tha Meloni.
Kryeministrja Meloni ka theksuar se çështja e emigracionit ka qenë një nga temat kryesore të diskutimeve me kryeministrin britanik Keir Starmer.
Ajo e cilësoi marrëveshjen me Shqipërinë si një model që duhet të ndiqet, duke nënvizuar rëndësinë e saj për të luftuar fenomenet e paligjshme të emigracionit.
“Është një fenomen që prek të gjithë kontinentin europian edhe jashtë kufijve të BE-së. Me Starmer ne jemi dakord se duhet të intensifikojmë luftën kundër trafikantëve, të punojmë drejt një bashkëpunimi më të madh midis policive tona, të forcojmë angazhimin për riatdhesimet vullnetare dhe të mos kemi frikë të eksplorojmë gjithashtu zgjidhje novatore, si ajo që Italia ka nisur përmes protokollit me Shqipërinë për të përpunuar kërkesat për azil në territore jo të BE-së, por nën juridiksionin italian dhe europian”, tha Meloni.
