Sikundër kemi raportuar disa ditë më parë në shumë qytetet të vendit tonë, në kundërshtim me vendimin e qeverisë, janë organizuar mbrëmjet e maturës.
Në këto organizime nuk ka patur asnjë rregull, protokoll sigurie dhe aq më pak distancim social, duke festuar brenda një ambienti të mbyllur, në kohën kur do të duhet që këto aktivitete të mos mbaheshin, në respektim të aktit normativ të vendosur nga qeveria.
Pasi mediat fillian të reagojnë rreth kësaj problemtaike mjaft serioze, duket se është zgjuar edhe qeveria. Një lokal në Berat është gjobitur me 10 milionë lekë të vjetra, sepse ka organizuar një mbrëmje mature në kundërshtim me aktin normativ për të parandaluar përhapjen e koronavirusit. Policia e qarkut ka shpërndarë pamjet ku shihet sesi patrullat vijojnë kontrollet për të parandaluar përhapjen e virusit nga personat e prekur.
NJOFTIMI I PLOTE:
Në kuadër të masave të marra për parandalimin e përhapjes së COVID-19, shërbimet e Drejtorisë Vendore të Policisë Berat dhe të Komisariateve në varësi të saj kanë ushtruar kontrolle të njëpasnjëshme në banesat e personave të prekur nga COVID-19, me qëllim respektimin me rigorozitet të vetëkarantinimit, si dhe në lokale për të respektimin e protokolleve të sigurisë. Strukturat e Policisë disponojnë listat e përditësuara me emrat e personave të prekur dhe rastet e reja. Në orare të ndryshme gjatë ditës dhe mbrëmjes, shërbimet e Policisë ushtrojnë kontrolle në banesat e këtyre shtetasve. Gjithashtu kontrollet kanë vijuar dhe në biznese e lokale të qarkut të Beratit dhe si rezultat u konstatua se në një lokal, në mbrëmje, ishte organizuar një festë mature, duke shkelur protokollet e sigurisë dhe urdhrin e Ministrisë së Shëndetësisë që ndalon zhvillimin e mbrëmjeve të maturës. Ndërhyrja në kohë e shërbimeve të Policisë bllokoi zhvillimin e këtij aktiviteti masiv në ambiente të mbyllura dhe pa masa sigurie. Në bashkëpunim me ISSHP, pronari i këtij lokali u gjobit me gjobë 1.000.000 lekë, pasi ka shkelur masat kufizuese të marra për parandalimin e përhapjes së COVID-19. Policia e Beratit apelon për të gjithë qytetarët që të respektojnë distancimin social, lokalet dhe bizneset të respektojnë protokollet e sigurisë, në mënyrë që të gjithë të kontribuojmë në mbrojtjen nga COVID-19.
