Një histori dramatike po zhvillohet para zyrave të SPAK, ku Rexhep Ademi, banor i Golemit të Kavajës, ka nisur këtë të mërkurë një grevë urie, duke kërkuar drejtësi për vrasjen e familjarëve të tij dhe për pronën që thotë se po i grabitet.
Ademi ka vendosur tre pankarta përpara Prokurorisë së Posaçme, të cilat mbajnë emrat e nënës dhe dajës së tij, që sipas tij janë vrarë për çështje pronësie. Ai deklaron se do të vazhdojë grevën deri në fund, “deri në vetëflijim”.
“I vdekur që i vdekur jam… Nënën ma vranë, dajën ma vranë, pronat i kam vuajtur, shtëpinë duan të ma prishin. Tani, do të bëjmë konflikt dhe ose do hyjmë në burg, ose do vritemi. Më mirë vdes këtu. Do bëj grevë këtu në rrugë, deri në vetëflijim,” është shprehur ai për mediat.
Në pankartat që ka vendosur përballë godinës së SPAK-ut, Ademi ka stampuar edhe imazhe të pronës që pretendon se po i grabitet. Ai kërkon nga drejtësia që të hetojë vrasjen e shtetasit Selman Ismaili dhe tentativën për vrasjen e Sheko Qerim Ademit, raste që, sipas tij, janë manipuluar për t’u mbyllur.
Sipas Ademit, familja e tij është viktimë e një zinxhiri krimesh që janë arkivuar padrejtësisht, përfshirë një rast që, siç thotë ai, është regjistruar gabimisht si “vetëvrasje”. Ai thekson se autorët janë të njëjtët persona që i kanë marrë edhe pronën, ndaj i kërkon Prokurorisë së Posaçme si institucionin e fundit ku ka ende besim, që të ndërhyjë për të bërë drejtësi.
“Unë nuk iki që këtu pa drejtësi. Do vdes këtu,” ka përfunduar Rexhep Ademi, duke e kthyer sheshin para SPAK në skenë të protestës së tij të fundit për të kërkuar të vërtetën.
