Mbrëmjen e djeshme një ngjarje e rëndë ka ndodhur në Komisariatin nr.3 në Tiranë, ku një efektiv policia ka vrarë me armë zjarri kolegun e tij. Ludian Zaimi ka qëlluar 7 herë mbi kolegun e tij Çaush Saliasi 55-vjeç, i cili ndërroi jetë në spital.
Ndërkohë që detaje të reja janë zbardhur nga ngajrja e rëndë e cila përveç të tjerash i vendos një ‘njollë’ të madhe imazhit të policisë së shtetit.
Vrasja që ndodhi në ambientet e Komisariatit nr.3, duket se nuk ka ndodhur nga një konflikt i çastit, por ishte pasojë e sherreve të vazhdueshme që autori ka pasur me viktimën.Kur këta të dy ishin me shërbim, bënin shaka me njëri tjetrin por gjithçka ka marrë një rrjedh ndryshe mbrëmjen e djeshme dhe gjërat janë kthyer në personale.
25-vjeçari ka deklaruar se me viktimën ka pasur përplasje herë pas here, dhe sipas tij 55-vjeçari e shante dhe ofendonte.
“Po bënim instruktazhin në momentin kur ndodhi ngjarja. Çaushi vijoi me përsëritjen e fjalëve dhe veprimeve fyese ndaj meje, me shau nga familja dhe ofendime te tjera, nuk durova dhe e qëllova. Jam përplasur edhe më herët me të, edhe në kohën kur kemi qenë në krye të detyrës, pasi me ofendonte shpesh. Konsumonte alkool dhe shfaqte sjellje denigruese ndaj meje dhe e kam duruar gjate gjithë kohës. Jam penduar për veprimin që kam bërë, ishte moment dobësie dhe mungese të vetëpërmbajtjes nga ana ime”, ka deklaruar 25-vjeçari.
