Mbrëmjen e djeshme Këshilli i Europës mori vendimin për zhvillimin e Konferencës së Donatorëve nga të gjithë shtetet e BE në Tiranë.
Paratë që do të mblidhen do të shkojnë, për projektin e rindërtimit.
Kryeministri Edi Rama, nëpërmjet një postimi në rrjetet sociale, e ka quajtur një lajm të shumëdëshiruar vendimin e KE.
Shefi i qeverisë shkruan, se mbajtja e premtimit nga liderët europianë, e mbush me energji dhe optimizëm, për të dalë më të fortë nga kjo tragjedi.
“Është një lajm i shumëdëshiruar marrja mbrëmë e vendimit të Këshillit Europian për mbajtjen e Konferencës së Donatorëve në Tiranë, në fund të muajit Janar, me qëllim mbështetjen e Programit të Rindërtimit nga të gjitha shtetet anëtare të BE. Mbajtja e premtimit që mora nga shumë prej liderëve europianë për këtë konferencë të domosdoshme, më mbush me energji e me optimizëm për suksesin e përpjekjes që të dalim të gjithë më të fortë nga kjo tragjedi, duke nisur nga motrat e vëllezërit tanë fatkeq, të cilët duhet t’i rikthejmë në shtëpi më të mira se ato që humbën, si edhe nga fëmijët e tyre, të cilëve do t’u bëjmë shkolla më të mira nga ato që kishin”, shkruan Rama.
Konferenca e donatorëve do të mbahet në fund të muajit janar në Tiranë.
