Taulant Balla ishte kandidati më i votuar nga radhët e Partisë Socialiste në zgjedhjet e 25 prillit, por jo vetëm. Ai arriti të siguronte vota më shumë se çdo kandidat tjetër, i çdo partie. I ftuar në emisionin “Real Story”, Balla ka folur edhe për këtë arritje duke thënë se nuk ka bërë fushatë për numrin e tij, por për PS-në. Ai gjithashtu deklaroi se socialistëve iu mungojnë tre mandate për shkak të numrit të madh të votave të pavlefshme.
“LSI në zgjedhje nuk krijon grup parlamentar. Nuk ka si ta krijojë, sepse duhen shtatë deputetë për grup parlamentar. Kemi marrë rezultat që e prisnim. Na mungojnë tre mandate, për shkak të numrit të madh të fletëve të votimit të pavlefshme. Nuk kam bërë fushatë për numrin tim, por për PS.
Duhet të shpjegonim më mirë sesi votohet saktë. Dita e zgjedhjeve ishte krejtësisht normale. Sa i përket se ku e dinim sa vota marrim ne si PS, Partia Socialiste është parti e organizuar.Ne kishim objektiv që të merrnim 800 mijë vota dhe do i merrnim, në rast se nuk do kishte kaq shumë fletë që do të dilnin të pavlefshme. Ne bëmë analizën e votës, si një parti serioze në vend”, tha Balla.
