Kanë mbërritur në Shqipëri 11 700 dozat e radhës të vaksinës Pfizer. Lajmin e ka bërë të ditur ministrja e Shëndetësisë Ogerta Manastirliu e cila shkruan ën një postim në Facebook se dozat e mbërritura janë pjesë e një kontrate të qeverisë me kompaninë, e po ashtu një pjesë prej tyre janë sasia e parë nga mbështetja e Bashkimit Europian.
Postimi i plotë i Manastirliut:
11,700 doza të tjera të vaksinës Pfizer sapo kanë mbërritur në Shqipëri – pjesë e kontratës së qeverisë me kompaninë Pfizer 7020 doza vaksine dhe një sasi e parë 4680 doza nga mbështetja e Bashkimit Europian.
Lajmi për mbërritjen e vaksinave Pfizer ishte komunikuar që ditën e djeshme në një video të shpërndarë nga kryeministri Edi Rama.
“Janë mbi 736 mijë doza vaksine tashmë të mbërritura në vend. Ndërkohë që presim përgjatë kësaj jave 11,700 doza vaksine, të cilat vijnë nga kontrata që ne kemi me Pfizer si dhe një pjesë e tyre, nga kontrata që kemi lidhur me Bashkimin Europian, si pjesë e instrumentit që Bashkimi Europian ka ndërtuar për mbështetjen për vendet e Ballkanit”, tha Manastirliu në videon e publikuar dje nga kryeministri.
Ndërkohë, vetë ministrja bëri me dije se vetëm ditën e sotme janë kryer 19, 886 vaksinime. Numri në total i vaksinimeve të kryera deri tani ka shkuar në 537, 837.
