Shoku i Martin Canit, Luis Meçaj, i cili mbeti i plagosur gjatë ngjarjes tragjike të 18 tetorit, është nisur sot në orën 06:00 për trajtim të specializuar në Bari të Italisë.
Meçaj, i cili u godit me thikë katër herë në stomak, shpinë dhe mushkëri, do të marrë kujdes mjekësor të avancuar pas dëmtimeve të rënda. Më 28 nëntor, ai kërkoi ndihmë financiare për shpenzimet mjekësore, pasi prindërit e tij nuk kishin mundësi për të përballuar trajtimet, përfshirë spitalin, psikologen dhe fizioterapinë.
Ngjarja tragjike ka ndodhur më 18 tetor, kur Martin Cani, 14 vjeç, humbi jetën pasi u qëllua me thikë në bark nga bashkëmoshatari i tij, Mario Përlleshaj, pas një konflikti që kishte nisur në shkollë dhe përfundoi jashtë saj.
Pas goditjes, Martin Cani ka arritur të ecë disa hapa përpara se të rrëzohej nga humbja e gjakut, dhe ndërrroi jetë në spital. I plagosur mbeti edhe Luis Meçja, shoku i ngushtë i viktimës, i cili po stërvitej me të në të njëjtin klub futbolli.
Autori, Mario Përlleshaj, ka marrë plagë në dorë dhe është trajtuar në spital privat. Pas ngjarjes, gjykata e Tiranës caktoi “arrest me burg” për Përlleshajn, i cili u transferua më 26 nëntor në Burgun e të Miturve në Kavajë.
