Këtë të premte mazhoranca rrëzoi kërkesën e grupit parlamentar të Partisë Demokratike për interpelancë urgjente dhe mocion me debat për çështjen e inceneratorëve, pas zhvillimeve të fundit me kërkesën e SPAK për Arben Ahmetajn. Deputeti i PD Gazment Bardhi u shpreh se sipas Konferencës së Kryetarëve, nuk ka urgjencë për kërkesat e tyre. Bardhi tha se tashmë parlamenti është shndërruar në ‘dyqan personal i Zotos dhe Mërtirit’ dhe se po financohet arratia e tyre dhe e Arben Ahmetajt.
“Konferenca e Kryetarëve vendosi sot rrëzimin e kërkesës për interpelancë dhe për mocion me debat duke shfaqur në këtë mënyrë vizionin për shndërrimin e Parlamentin në një dyqan personal të Zotos dhe Mërtirin. Fakti që dy mafiozë në arrati të inceneratorëve marrin pagesa çdo ditë për punë ta pakryera, nuk është një çështje urgjente për ta. E kuptoj vështirësinë që ka Rama si person i përfshirë, koka e inceneratorëve për të dhënë shpjegime, por sado siklet dhe hall të ketë do duhet të respektohet Kushtetua. Argumenti i tyre është se nuk ka urgjencë. Po financojnë arratinë e Zotos, Mërtirit dhe tani të Ahmetajt”, tha ai.
Ndërkohë më herët deputeti socialist Toni Gogu u shpreh se nuk ka asgjë urgjente pasi çështja e inceneratorëve i ka kaluar tashmë drejtësisë.
