Maturantët një ditë pas provimit të Gjuhës Shqipe dhe Letërsisë kanë dalë në protestë duke u ankuar për mënyrën e ndërtimit të tezës.
Një prej pyetjeve që ata kanë thënë se është problematike, ka të bëjë me një poezi të Lasgush Poradecit.
Në lidhje me këtë ka reaguar dhe vazja e poetit të njohur, Marie Poradeci, e cila shkruan në Facebook se ata që kanë hartuar tezën, janë “komplet injorantë”.
Marie shkruan se kuptimi i vërtetë i fjalës “dlirnja”, nuk është asnjë nga alternativat e dhëna nga Ministria.
Statusi i plotë
Kjo poezi e Lasgush Poradecit kish rene ne testet e maturave 2020 me date 11 qershor 2020. Ne test thuhej qe si eshte kuptimi i fjales “dlirnja” dhe alternativat ishin
1) gezohem
2) çlirohem
3)gjunjezohem
4) shmangem.Ata qe bejne testet jane komplet injorante. Asnjera nga keto nuk eshte kuptimi i fjales dlirnja. (strofa e katert) Turp te kene. Ju si mendoni?
Ministrja e Arsimit Besa Shahini u shpreh pasditen e sotme se e ka ndjekur me keqardhje protestën, por shton se nuk beson se të ketë ndodhur ndokund tjetër që nxënësit të protestojnë për “provimet e vështira”.
Nga ana tjetër, edhe Qendra e Shërbimeve Arsimore është shprehur se provimi është mbështetur tërësisht mbi programin e reduktuar, por ka shtuar se në përfundim të marrjes së rezultateve, do të shikojë kurbën e shpërndarjes së pikëve dhe bazuar mbi këtë kurbë, nëse do të vihet re zhvendosje të saj do të shikohet mundësia e ri-shpërndarjes së peshave të pikëve në test.
Nga ana tjetër, informon se dy provimet e ardhshme të Maturës Shtetërore do të jenë me kohëzgjatje 2.5 orë dhe me alternativa, nga 2 orë që ishin parashikuar në fillim.