Shteti i Kosovës përkujton sot masakrën më të madhe të luftës, atë të Krushës së Madhe, në afërsi të Rahovecit.
Si sot 25 vjet më parë në Krushë të Madhe forcat serbe masakruan 243 persona, kryesisht djem dhe burra, ndërsa shumë persona të tjerë rezultuan të zhdukur e 893 shtëpi dhe objekte të tjera u dogjën.
Masakra në Krushë të Madhe ishte pjesë e aktakuzës për krime lufte kundër ‘kasapit të Ballkanit’, Sllobodan Millosheviç dhe disa udhëheqësve të tjerë politikë e ushtarakë serbë.
Kujtojmë se edhe pse ka dëshmi dhe fakte për këtë masakër, asnjëherë nuk pati një proces të mirëfilltë hetimor dhe askush nuk është dënuar për krimet e kryera në këtë fshat.
Kjo masakër ndodhi një ditë pas fillimit të bombardimeve të Jugosllavisë nga NATO si kundërpërgjigje reaguese ndaj luftës agresive që Serbia po e zhvillonte në Kosovë që prej fillimit të vitit 1998.
Dëshmitarët tregojnë se forcat serbe kishin planifikuar të vrisnin të paktën 500 persona.
Gjatë luftës së vitit 1999 në fshatin Fortesë janë vrarë nga forcat serbe 69 martirë, në Brestoc 5 dëshmorë dhe 49 martirë, ndërsa në Celinë janë vrarë 75 martirë.
