Sot është nënshkruar një marrëveshje midis Ministrisë së Arsimit, Rinisë dhe Sporteve, Ministrisë së Drejtësisë dhe Ambasadës Italiane në Tiranë, e cila ka për qëllim promovimin e përbashkët të një projekti pilot edukativ me modul antikorrupsionin. Ky projekt mësohet se do të nisin shtatorin e ardhshëm dhe se do të zbatohet në katër shkolla të mesme ku ndër të tjera do të mësohet edhe gjuha italiane. Gjithashtu në fokus do të jetë mbështetja e nxënësve për krijimin e kulturës së ligjit dhe qytetarisë së përgjegjshme dhe aktive.
Ministrja Evis Kushi ka folur për rendësin që ka kjo marrëveshje dhe ndër të tjera për rëndësinë e kësaj marrëveshjeje dhe misionin kryesor të MASR në sistemin arsimor.
“Edhe unë jam shumë e nderuar sot që kemi mundësinë të nënshkruajmë këtë marrëveshje për një projekt pilot edukativ me modul antikorrupsionin. Në fakt, misioni kryesor në shkollat tona, në të gjithë sistemin tonë arsimor, është që t’i pajisim nxënësit me njohuri dhe aftësi që nesër të bëhen jo vetëm profesionistë të mirë, punonjës të suksesshëm, por edhe qytetarë të denjë. Për këtë arsye, në shkolla tona ne përpiqemi që t’i edukojmë me vlerat më të mira njerëzore, me vlerat më të mira të qytetarisë dhe demokracisë. Sa më shpejt, në moshë të hershme t’i edukojmë këto vlera tek nxënësit tanë, aq më shumë shanse do të kemi që nesër të jetë vërtetë ata qytetarët e denjë për një shoqëri të shëndetshme”, ka thënë ministrja e Arsimit Evis Kushi.
Ndër të tjera, ministrja u shpreh se në kurrikulat shkollore janë edhe lëndët e qytetarisë dhe lëndë të tjera në të cilat përfshihet lufta kundër korupsionit.
“Deri më sot, ne në fakt i kemi në kurrikulat shkollore lëndë të tilla, siç është lënda e qytetarisë, por edhe lëndë të tjera, ku përfshihen njohuritë e luftës kundër korrupsionit dhe vlerave më të mira të shoqërisë, por jam e bindur që ky projekt dhe ky modul i ri do të japë një kontribut shtesë. Italia, si një partner strategjik i Shqipërisë në shumë fusha, natyrisht edhe në fushën e edukimit, na jep një mbështetje të jashtëzakonshme, por sidomos në rrugën e integrimit drejt BE. Ne duhet të fuqizojmë jo vetëm institucionet tona, por natyrisht edhe shoqëria duhet të përshtatet me vlerat më të mira demokratike dhe njerëzore”, ka thënë ministrja e Arsimit, Evis Kushi.
