Ndërkohë që opozita është duke trumbetuar se nuk do të lejojë zgjedhjet lokale pa u plotësuar disa kushte, mazhoranca duket e vendosur për t’i zhvilluar ato pavarësisht situatës së krijuar.
Ditën e sotme pas përfundimit të takimit me deputetët gjermanë, ka qenë vet kreu i Grupit Parlamentar të PS-së, Taulant Balla i cili ka thënë se mazhoranca është e gatshme për një marrëveshje, por kjo pa cënuar ligjin dhe Kushtetutën.
“Respektimi i ligjit, i afateve janë detyrime të çdo aktori politik. Kjo nuk varet nga ne, por nga drejtuesit e partive opozitare. Ajo që dua të them është shumë e qartë, zgjedhjet e 30 qershorit do të zhvillohen. Arsyeja pse PD është jashtë Parlamentit nuk varet nga ne”, ka thënë Balla.
Balla gjithashtu ka thënë një detaj të ri, që Presidenti Meta është duke kërkuar që të organizojë një tryezë me partitë dhe PS është e hapur për këtë gjë, mirëpo kjo gjithmonë pa shkelur ligjin. Në këtë rast Balla i referohej zhvillimit të zgjedhjeve dhe e ka përsëritur edhe një herë se kushdo që përpiqet t’i pengojë ato rrezikon deri në tetë vite burg.
Gjithashtu kreu i Grupit Parlamentar ka thënë se takimi me deputetët gjermanë ka qenë i frytshëm dhe perspektiva evropiane e vendit tashmë është e qartë bashkë me rolin e Gjermanisë, e cila është pro hapjes së negociatave.
“Kujtoj që Mali i Zi apo Serbia kanë hapur një sërë kapitujsh, por kur vjen kapitulli 23, me shtetin e së drejtës, Shqipëria ka bërë hapa të rëndësishëm, që përmblidhen në suksesin e reformës në drejtësi. I kemi të gjitha shanset për të marrë një përgjigje pozitive për përcaktimin e një date për fillimin e bisedimeve, vlerësohet roli i Shqipërisë si një faktor stabiliteti, bashkëndamë me kolegun gjerman edhe shqetësimet e përbashkëta për një rritje të ndikimit të vendeve dhe aktorëve të tjerë jashtë BE-së në Ballkan, por që pozicioni ynë është shumë i qartë: Shqipëria ka vetëm një plan “A”, vazhdim i reformave për anëtarësimin në BE”, ka thënë Taulant Balla.
