Një tjetër grup emigrantësh pritet të mbërrijë sot në Shëngjin, teksa anija “Spica” e Marinës Ushtarake italiane, me rreth 30 persona në bord, është nisur në orët e para të mëngjesit nga porti i Brindisit.
Sipas informacioneve paraprake, në bord ndodhen shtetas të kombësive të ndryshme.
Ministria e Brendshme italiane ka konfirmuar se 30 emigrantë janë riatdhesuar tashmë nga qendra në Gjadër.
Sipas dekretit të qeverisë italiane, qëndrimi në kampin e Gjadrit mund të zgjasë deri në 18 muaj, për emigrantët që nuk përfitojnë të drejtën e azilit dhe presin deportimin.
Fillimisht, qendra në Gjadër ishte parashikuar të përdorej për strehim të përkohshëm, për një periudhë jo më shumë se 28 ditë, për emigrantët e shpëtuar në det.
Por me dekretin e ri të qeverisë Meloni, ajo do të funksionojë edhe si qendër ndalimi për ata që konsiderohen të padëshiruar dhe që do të kthehen në vendet e tyre të origjinës.
Ndërkohë, pritet edhe vendimi i Gjykatës Evropiane të Drejtësisë, pas apelimit të bërë nga Gjykata e Romës, e cila deri tani nuk ka njohur legjitimitetin e ndalimeve ndaj emigrantëve të shpëtuar dhe më pas transferuar në Shqipëri.
Argumenti kryesor lidhet me listën e vendeve të sigurta, që sipas qeverisë italiane duhet të jetë individuale për çdo shtet, çka ka krijuar mosmarrëveshje juridike brenda sistemit italian dhe me BE-në.
Në janar 2025, në kampin në Shëngjin mbërriti grupi i tretë dhe më i madh i emigrantëve, pas dy valëve të mëparshme në tetor dhe nëntor. Në të tre rastet, gjyqtarët italianë nuk pranuan ndalimin e tyre në objektet shqiptare, duke kundërshtuar pretendimet e qeverisë italiane mbi listimin e vendeve të sigurta.
Marrëveshja mes kryeministrave Giorgia Meloni dhe Edi Rama, e arritur në vitin 2023, u kritikua gjerësisht nga organizatat ndërkombëtare për të drejtat e njeriut, të cilat e konsideruan një përpjekje për të zhvendosur trajtimin e çështjes së emigrantëve drejt vendeve më të dobëta institucionalisht.
Megjithatë, më 30 dhjetor 2024, Gjykata e Kasacionit në Itali i dha të drejtë qeverisë Meloni, duke konfirmuar se vlerësimi për vendet e sigurta i takon Ministrisë së Jashtme dhe jo gjyqësorit. Kjo e hapi rrugën për vijimin e projektit, i cili, pavarësisht kundërshtimeve nga opozita italiane për shkak të kostos prej 800 milionë eurosh, është parë nga disa liderë evropianë dhe Komisioni Evropian si një model i mundshëm për menaxhimin e emigrantëve jashtë kufijve të BE-së.
