Një anije me 15 emigrantë të cilëve u është mohuar e drejta e azilit në Itali pritet të ankorohet këtë të enjte në portin e Shëngjinit rreth orës 18:00.
Pas mbërritjes, ata do t’i nënshtrohen procedurave përkatëse në qendrën pritëse, përpara se të transferohen në kampin e Gjadrit.
Ky është grupi i katërt i emigrantëve që vjen në Shqipëri në kuadër të marrëveshjes mes qeverisë italiane dhe asaj shqiptare, të formalizuar me dekretin e ri të kryeministres Giorgia Meloni.
Sipas kësaj marrëveshjeje, personat që marrin përgjigje negative për azil në Itali do të dërgohen për strehim të përkohshëm në territorin shqiptar, në një strukturë të posaçme të ngritur në Gjadër.
Aktualisht, kampi në Gjadër strehon rreth 30 emigrantë të dëbuar, ndërsa autoritetet shqiptare mbeten në gatishmëri për pritjen e kontingjenteve të tjerë në ditët në vijim.
