Në mbledhjen e ardhshme që do të kryhet, Komisioni për Sëmundje Infektive mund ta heqë orën policore, e cila është ende në fuqi. Ministri i Shëndetësisë në Maqedoni, Venko Filipçe, ka bërë me dije se në mbledhjen e ardhshme të Komisionit, që do të mbahet para 15 qershorit, mund të miratohet shfuqizimi i orës policore, e cila është në fuqi prej 00:00 deri 04:00.
“Informacioni që e pamë se në 24 orët e fundit në klinikat e Shkupit nuk është pranuar asnjë pacient i ri, është i shkëlqyer”, tha fillimisht ministri i Shëndetësisë. “Mbledhja e radhës e Komisionit për Sëmundje Infektive, do të jetë para 15 qershorit.
Nëse vazhdojnë këta numra pas 15 qershorit, do të ketë lehtësim shtesë të masave, para se gjithash mendoj për orën policore, si dhe rekomandime për ngjarje tjera”, u shpreh Filipçe. Ai njoftoi se edhe përkundër uljes së numrit të infektimeve me koronavirus, sistemi shëndetësor do të vazhdojë të përgatitet për valë të re eventuale të COVID-19.
Ndërsa në Shqipëri, situata është përmirësuar goxha dhe përveçse nuk ka pasur vdekje, kanë qenë të paktë edhe njerëzit e prekur nga virusi. Megjithatë, nuk flitet për heqje të orës policore, e cila nga 22:00, është shtyrë në 23:00.
Ndoshta, ne nuk dimë gjë dhe situata në Shqipëri është me keq se sa paraqitet nga Komiteti Teknik i Ekspertëve, ose në të kundërt, do të hiqej ora policore dhe këtu tek ne…
