Ministrja e Shëndetësisë dhe Mbrojtjes Sociale, Ogerta Manastirliu ka deklaruar nga foltorja e Kuvendit se së shpejti në vendin tonë do të vijnë edh 500 mijë vaksina të reja kineze. Manastirliu tha se situata epidemiologjike në Shqipëri është pozitive dhe e qëndrueshme. Ministrja ka theksuar se vendi jonë ka hyrë në javën e 9 me rënie të qëndrueshme.
Ndër të tjera, ministrja theksoi se sot në vendin tonë do të vijnë edhe 11 e 700 vaksina të tjera Pfizer, ndërsa në total numri i vaksinave të mbërritura ka shkuar në 967 mijë. Aktualisht, fasha e vaksinimit në Shqipëri ka zbritur në 58 vjeç.
“Kemi hyrë në javën e 9 me rënie të qëndrueshme. Sot kemi më pak se 179 raste aktive në gjithë vendin. Edhe në dy javët e fundit ka patur një rënie të ndjeshme të incidencës. Shtrimet në spitale zënë vetëm 5% të kapaciteteve. Shqipëria konsiderohet si një zonë me risk të ulët për përhapjen e covid. Kurba e vaksinimit është në një rritje konstante. Programi i vaksinimit do të vijojë edhe gjatë sezonit të verës deri në vaksinimin e të gjithë popullatës. Sot presim sërish 11 700 doza të vaksinës Pfizer dhe arrijmë 967 mijë vaksina të mbërritura deri tani në vendin tonë.
Së shpejti presim edhe lëvrimin e dozave të radhës. Marrëveshja që po diskutojmë në këtë seancë garanton edhe 500 mijë doza vaksinash kineze, tashmë e miratuar edhe nga OBSH. Më shumë se 836 mijë vaksinime janë bërë deri tani në të gjithë vendin.”, ka thënë ministrja e Shëndetësisë, Ogerta Manastirliu.
