Lufta që po zhvillohet mes Ukrainës dhe Rusisë ka pasoja të shumta të tërthorta edhe në ekonominë shqiptare, disa prej të cilëve kanë filluar të ndihen që tani.
Ndërkohë që luftimet Ukrainë-Rusi janë në ditën e gjashtë, kreu i Partisë Demokratike në Shqipëri bën thirrje që të merren masat e duhura në mënyrë që të përballohen pasojat që vijnë në vendin tonë. Basha shprehet se ndodhemi në kushtet e rritjes së çmimeve dhe situata për familjet shqiptare pritet të përkeqësohet në vazhdim, ndërkohë që qeveria duhet të ketë një plan masash, që sigurojnë rezervat e mjaftueshmë ushqimore. Gjithashtu plani i masave përfshin edhe përcaktimin e mënyrave se si mund t’iu vihet në ndihmë familjeve në nevojë.
Sipas kreut të Partisë Demokratike duhen rimarrë në shqyrtim 2 masa të cilat janë përkatësisht:
- Uljen e TVSH për ushqimet e shportës nga 20 në 6 % dhe
- Heqjen e menjëhershme të taksës rama mbi Karburantin prej 240 lekësh për litër.
Mesazhi i kreut të Partisë Demokratike Lulëzim Bashës:
Në një situatë të rritjes së pritshme të cmimeve si pasoje e agresionit rus ndaj Ukrainës, vështirësitë ku ndodhen familjet shqiptare do të thellohen edhe më shumë. Prandaj duhet që menjëherë qeveria të ketë gati një plan masash që të mundësojnë sigurimin e rezervave të mjaftueshme ushqimore, si dhe të përcaktojë mënyrat për t’u ardhur në ndihmë familjeve në nevojë. Për të kompensuar dhe lehtësuar familjet shqiptare në këto kushte, qeveria duhet të rimarrë në shqyrtim dy masa të propozuara nga Partia Demokratike:
1. Uljen e TVSH për ushqimet e shportës nga 20 në 6 % dhe
2. Heqjen e menjëhershme të taksës rama mbi Karburantin prej 240 lekësh për litër.
