Ish-prokurori i Krimeve të Rënda, Blerim Tominaj është shkarkuar sot nga detyra.
Komisioni i Pavarur i Kualifikimit mori këtë vendim pasi ka konstatuar probleme gjatë procesit të vlerësimit të pasurisë dhe të figurës së tij.
Kujtojmë këtu se ditën e premte, në seancën dëgjimore të KPK, ish-prokurori i Krimeve të rënda nuk u paraqit.
Ai u përfaqësua në seancë nga avokati Adriatik Camaj, ish-prokuror në Prokurorinë e Tiranës dhe një prej ish-kandidatëve për në Këshillin e Lartë të Prokurorisë.
Trupa gjykuese e përbërë nga Genta Tafa Bungo kryesuese, Suela Zhegu relatore dhe Etleda Çiftja anëtare, gjatë hetimeve kishin vërejtur disa probleme në pasurinë e tij.
KPK kishte përfunduar vetëm administrativ për prokurorin Tominaj, për kriterin e pasurisë, ku ILDKPKI ka identifikuar mungesë të dokumentacionit për pasuritë e trashëguara nga i ati dhe pasaktësi në deklarime.
Gjatë seancës dëgjimore, KPK ngriti dyshime se prokurori Tominaj kishte mungesë burimesh të ligjshme financiare për dy lokale, dy apartamente, si dhe depozita bankare në vlerë mijëra euro.
Shkelje u konstatuan edhe për një lokal 179 m2 në Durrës në vlerën 170 mijë euro si pasuri e trashëguar nga testamenti i babait të tij të ndjerë.
Por probleme ka pasur dhe me një apartament me sipërfaqe 55 m2 në plazhin e Durrësit, në vlerën rreth 25 mijë euro.
KPK në realicionin e lexuar të premten u shpreh se Tominaj ka probleme dhe me prona të tjera, pasi nuk ka burime financiare të deklaruara që t’i justifikojnë ato.
