Industria e influencuesve në Shqipëri po shndërrohet në një treg fitimprurës, por një pjesë e madhe e të ardhurave të gjeneruara në këtë sektor mbeten jashtë deklarimeve zyrtare.
Administrata Tatimore ka raportuar se gjatë vitit të kaluar influencerët shqiptarë kanë përfituar rreth 33 milionë euro nga platformat sociale si Meta, Facebook, YouTube dhe Google.
Megjithatë, kjo shumë ka shumë gjasa të mos pasqyrojë realitetin e plotë, pasi një numër i madh individësh nuk i deklarojnë të gjitha fitimet e tyre.
Të dhënat e publikuara nga Tatimet tregojnë se ky sektor po fiton gjithënjë e më shumë rëndësi në ekonominë digjitale të vendit.
Rrjetet sociale si TikTok, Facebook dhe Instagram kanë nga mbi 1.2 milionë përdorues shqiptarë secili, ndërsa platforma “X” e Elon Musk numëron rreth 200 mijë përdorues në Shqipëri.
Rritja e audiencës ka ndikuar drejtpërdrejt edhe në shtimin e të ardhurave për krijuesit e përmbajtjes, duke e bërë këtë një nga tregjet më të mëdha të fitimit për individë të pavarur.
Administrata Tatimore u ka kërkuar influencuesve të përmbushin detyrimet e tyre fiskale dhe të deklarojnë të ardhurat përmes sistemit “DIVA 2024”, me afatin e fundit më 1 prill.
Pavarësisht kësaj thirrjeje, eksperienca e mëparshme ka treguar se shumë individë nuk raportojnë të gjitha të ardhurat e tyre nga platformat digjitale.
