Lista Serbe, subjekti më i madh i serbëve në Kosovë, ka njoftuar se do të ankohet në Panelin Zgjedhor për Ankesa dhe Parashtresa pas vendimit të Komisionit Qendror të Zgjedhjeve (KQZ), i cili nuk e certifikoi për pjesëmarrje në zgjedhjet e 9 shkurtit.
Kryetari i Listës Serbe, Zllatan Ellek, e cilësoi vendimin si jodemokratik dhe kundër serbëve, duke shtuar se do të paraqesin ankesë në PZAP dhe presin një vendim të qartë që do të rrëzojë këtë vendim që e quajnë absurd dhe antiserb.
Vendimi i KQZ-së u mor pas dy votave kundër të anëtarëve të Lëvizjes Vetëvendosje, Sami Kurteshi dhe Albin Krasniqi. Kurteshi e argumentoi vendimin duke thënë se Lista Serbe nuk e njeh Kosovën si shtet dhe përdor termin “Kosova dhe Metohia” dhe fraza të tjera si “Rroftë Serbia.” Ai gjithashtu e kritikoi Listën Serbe për lidhjet me presidentin serb, Aleksandar Vuçiq, dhe për mosdistancimin nga sulmi i armatosur në Banjskë, i cilësuar nga Kosova si akt terrorist.
Ambasada e SHBA-së shprehu shqetësim se ky proces i certifikimit mund të jetë ndikuar nga motive politike dhe inkurajoi Listën Serbe të ushtrojë të drejtën e saj për apel.
