Komisioni Qendror i Zgjedhjeve (KQZ) deklaroi të martën se vendimi i Panelit Zgjedhor për Ankesa dhe Parashtresa për certifikimin e Listës Serbe, partisë kryesore të serbëve të Kosovës, është i detyrueshëm dhe duhet të zbatohet.
Ky qëndrim erdhi pas një vendimi të Gjykatës së Lartë të Kosovës që hodhi poshtë ankesën e Lëvizjes Vetëvendosje ndaj certifikimit të Listës Serbe për zgjedhjet parlamentare të 9 shkurtit.
Kryetari i KQZ-së konfirmoi se vendimi i Panelit është përfundimtar dhe nuk u zhvillua votim për këtë çështje.
Sidoqoftë, përfaqësuesit e Vetëvendosjes në Komision e kundërshtuan certifikimin, duke e cilësuar Listën Serbe si parti të mbështetur nga Beogradi dhe që nuk njeh shtetin e Kosovës.
Vendimi ka ngjallur reagime të ashpra nga diplomacia perëndimore dhe vëzhgues të pavarur, të cilët e kanë cilësuar si të motivuar politikisht.
Bashkimi Evropian paralajmëroi se mos certifikimi i një partie për arsye politike, dhe jo procedurale, përbën një pengesë serioze për demokracinë në Kosovë.
“Të gjithë kandidatët e kualifikuar duhet të kenë mundësinë të marrin pjesë në zgjedhje të lira dhe të ndershme, në përputhje të plotë me ligjin e Kosovës. Procesi i certifikimit duhet të bazohet në standarde dhe procedura ligjore në përputhje me ligjin në fuqi, dhe jo në konsiderata politike”, thuhet në komunikatë duke nënvizuar se pret që procesi zgjedhor të jetë transparentë, i besueshëm dhe pa ndërhyrje politike.
“Përgjegjësia për të ruajtur garancitë demokratike është e të gjithë anëtarëve të KQZ-së, pavarësisht nga përkatësia e tyre politike. Një çështje e tillë themelore nuk duhet të politizohet dhe të përdoret si zë në fushatën elektorale”, thuhet në komunikatë.
Për pjesëmarrje në zgjedhjet e 9 shkurtit janë regjistruar 28 subjekte politike, gjashtë nga të cilat janë nga radhët e komunitetit serb./ VOA
