Lirimi i Endrit Dokles, Prokuroria e Krujës do të ankimojë vendimin

Google+ Pinterest LinkedIn Tumblr +

Gjyqtarja e Krujës, Enkelejda Hoxha liroi nga bugu ish-anëtarin e bandës së Durrësit, Endrit Doklen.

Ajo vendosi të shuajë dënimin me burg të përjetshëm, duke e çuar në 25 vjet heqje lirie.

Për më tepër, Dokle duhej të qëndronte në burg edhe 4-5 vite, por gjyqtarja i ka njohur si vite burgu edhe amnistinë, në kundërshtim të hapur me ligjin.

Në lidhje me këtë rast flagrant ka reaguar Prokuroria e Krujës.

Organi i akuzës, ka kërkuar rrëzimin e kërkesës së avokatëve të Dokles, me arsyetimin, se nuk plotësohet kushtet ligjore.

Gjithashtu prokuroria ka kërkuar përjashtimin nga trupa gjykuese, të gjyqtares Hoxha, me pretendimin se ka dhënë vendime në favor të kërkuesit.

Pritet që Prokuroria e Krujës të parashtrojë në ankimim të gjitha kundërshtimet në lidhje me shkeljet e kryera nga gjykata.

Reagimi i plotë

Gjykata e Shkallës së Parë Krujë me vendimin nr. 6/123 datë 14.01.2020  vendosi: “Pranimin e kërkesës së kërkuesit Endrit Dokle. Lirimin me kusht të kërkuesit Endrit Dokle, i biri i Mensurit dhe i Rahimes datëlindja 31.12.1983, lindur në Kukës dhe banues në Tiranë, duke e vënë në provë për një periudhë  prej 5 (pesë)  vjetësh. Në zbatim të nenit 60 pika 9 të Kodit Penal detyrohet Endrit Dokle që gjatë kohës së provës të mos shoqërohet me persona të caktuar kryesisht me të dënuar apo bashkëpunëtorë të veprës penale. Në zbatim të nenit 60 pika 10 e Kodit Penal detyrohet kërkuesi Endrit Dokle që gjatë periudhës së provës të mos zotërojë, mbajë apo përdorë armë. Urdhërohet kërkuesi Endrit Dokle të mbajë kontakte me Shërbimin e Provës”.

Prokuroria Pranë Gjykatës së Shkallës së Parë Krujë ka qenë pjesmarrëse në këtë proçes dhe ka mbajtur qëndrimin e plotë për rrëzimin e kërkesës, me arsyetimin se jo vetëm se nuk plotësohen kushtet ligjore të parashikuara nga neni 64 i Kodit Penal, por edhe se nuk ekzistojnë të provuara arsyet e veçanta që kërkon norma. Gjithashtu prokuroria ka kërkuar përjashtimin e gjyqtares së çëshjtes me arsyetimin se i njëjti trup gjykues ka dhënë vendime në favor të kërkuesit, kërkesë e cila nuk është pranuar nga gjykata. Të gjitha kundërshtimet në lidhje me shkeljet proçedurale si dhe zbatim të gabuar të ligjit Prokuroria Pranë Gjykatës së Shkallës së Parë Krujë do ti parashtrojë në ankim brenda afatit ligjor.

Shpërndaje
Share.

Komento