Mësuesi nga Tepelena, që akuzohej se kishte ngacmuar seksualisht nxënësen e tij, është dënuar me 3 vjet e 6 muaj burg nga Gjykata e Gjirokastrës.
Neshat Tepelena u denoncua publikisht nga ish-nxënësja e tij, në shkollën 9-vjeçare “Ali Hajdini” në Kalasë të Delvinës.
E mitura pretendon se mësuesi, pasi i bëri presion 11-vjeçares për notën e puthi në buzë, shkruan “Panorama”.
“Isha bashkë me një shoqe dhe po pastronim shkollën. Duke pastruar, më thotë mësuesi: Lerja leckën shoqes dhe hajde pak në klasë. Më tha,- Kur ta bëja me shenjë, përse nuk dilje jashtë? E pyeta – pse të dilja? Po nuk dole më, do të të vë 4,- tha ai dhe më puthi. Unë ika”, ka treguar vajza e mitur.
Për shkak të paragjykimeve, ngacmimi seksual është mbajtur i fshehtë.
Mirëpo ishte nëna e vajzës, që e bëri publike ngjarjen.
Pasi vajza e tyre refuzonte të shkonte në shkollë, prindërit bënë denoncimin ndaj mësuesit 60-vjeçar.
Në qershor të 2018-ës, mësuesi u lirua nga burgu.
Mirëpo në seancën e rivlerësimit, organi i akuzës kërkoi burg pa afat për Tepelenën, deri në zbardhjen e analizave.
Trupa gjykuese asokohe vendosi vetëm detyrim paraqitje për mësuesin.
Banorët e fshatit ndërkohë shprehen se mësuesi ka qenë edhe më parë i përfshirë në të tilla ngjarje, madje çështja shkoi deri në Drejtorinë e Arsimit, por kaloi vetëm me vërejtje.
