Drejtori i Agjencisë Shtetërore të Kadastrës Artan Lame ka folur sot për mbivendosjen e pronave në jugun e vendit.
Në një intervistë për ABC News ai tha se procesi i konfliktit të pronave duhet të marrë fund, duke shtuar se mos regjistrimi i banesave është një problem shumë i madh në Shqipëri.
“Procesi në jug është pajisja për herë të parë me tapi të rregullta pronësie për pronat e tyre. Jemi në fazën që po mbledhim informacione nga qytetarët. Askush nuk duhet të dorëzojë dokumente origjinale, por fotokopje. Kemi hapur tre zyra në jug ku të kërkohen të dërgohen fotokopjet dhe jo origjinalet e dokumenteve. Kur të mbarojnë edhe matjet në terren, pas disa muajsh do të kemi një hartë në jug dhe të gjitha këto do të bëhen publike. Në gjithë procesin e punës së Kadastrës kam tre aleatë të mëdhenj. Një nga aleatët është kryeministri i cili e ndjek situatën vazhdimisht, aleati tjetër është publiku i interesuar. Ndërsa aleati i tretë i madhe është media sepse çon zërin tim. Është shumë me vlerë ajo që i themi qytetarëve.
Më tej, Lame theksoi se në vitet 90-92 janë bërë marrëzira nga mosnjohja e proceseve, por më pas filloi strukturimi ku në skenë sipas tij dolën edhe interesat.
Ndërsa, sa i përket regjistrimit të pronave ai shtoi se të gjitha qeveritë nuk i kanë shpëtuar këtij problemi.
“U bë një vendim qeveria që quhet 608, por nuk funksionoi. Më pas u bë një VKM që ende funksionon. Kam parë shumë mungesë morali në këto vite, vëllezër që ia fusin vëllezërve, kushërinj që gënjejnë pa pikë turpi. Fëmijë që përplasen me prindërit.”
I ndalur te situata së Kadastrës e Vlorës, Lame u shpreh se ka ende probleme të cilat nuk kanë marrë zgjidhje dhe se po punohet në këtë drejtim.
Sipas tij, ndryshimi midis Vlorës dhe Shkodrës, është se në veri nuk kanë hyrë te njëri-tjetri, pasi i ndajnë gjërat me pushkë, ndërsa në jug kur kanë bërë mbivendosje e kanë bërë edhe me njëri-tjetrin dhe nuk ka prodhuar harta sepse do të dilnin përplasjet.
