Një lajm i mirë vjen nga spitali “Shefqet Ndroqi”që deri tani ka qenë spitali Covid-2, për rikuperimin e pacientëve të infektuar me virusin. Tashmë aty nuk do të trajtohen më pacientët me Covid-19, por do i rikthehet funksionit normal si Sanatorium. Pacientët e shtruar Brenda këtij spitali do të transferohen drejt Infektivit Brenda dy apo tre ditësh. Tashmë Infektivi do të jetë struktura e vetme spitalore që do të presë pacientë të infektuar me Covid-19, pasi më herët janë mbyllur edhe spitalet Covid 3 dhe Covid 4.
Kujtojmë se ditët e fundit shifrat e pandemisë në Shqipëri kanë ardhur në rënie. Ditën e djeshme u raportuan vetëm 22 raste të reja infektimesh dhe asnjë viktimë nga koronavirusi. Ministria e Shëndetësisë njoftoi se në spitalet COVID po trajtohen 37 pacientë, nga të cilët 7 pacientë janë në terapi intensive.
Aktualisht në vendin tonë po vazhdon vaksinimi masiv që ka nisur që prej muajit janar me vaksinat e para nga Pfizer. Më pas në Shqipëri kanë mbërritur edhe dozat e para nga AstraZeneva, ndërsa në muajin mars iu hap rruga edhe vaksinave kineze e asaj ruse të Sputnik V. Shifrat e vaksinimeve i kanë kaluar 700 mijë, ndërsa objektivi është që të arrihen 1 milion vaksinime brenda muajit qershor.
