Policia në Brazil ka vrarë 25 të dyshuar si pjesë e asaj që autoritetet e quajtën një ofensivë të paprecedentë kundër grabitësve të bankave të armatosur rëndë, grabitjet e të cilëve kanë bllokuar disa qytete të mëdha. Kriminelët e dyshuar u qëlluan në orët e para të së dielës në shtetin juglindor të Minas Gerais, ku policia pretendoi se ata ishin gati të kryenin një sulm.
Një raport në gazetën lokale “O Tempo” tha se vrasjet ndodhën në dy shtëpi fermash në Varginha, një qytet rreth 395 km në veri-perëndim të Rio de Zhaneiros.
“Ky operacion … do të hyjë në histori”, i tha radios lokale sekretari i sigurimit të shtetit Minas Gerais, Rogério Greco.
Policia federale, e cila mori pjesë në mision, tha se grupi kishte “një arsenal të vërtetë ushtarak” duke përfshirë pushkë sulmi, mitralozë të kalibrit 50, eksplozivë dhe jelek antiplumb.
Layla Brunella, zëdhënësja e forcës policore ushtarake të Minas Gerais, tha se hajdutët e dyshuar i përkisnin “cangaços moderne” të Brazilit – një referencë për grupet e jashtëligjshëm që bredhin në zonat verilindore të vendit në fillim të shekullit të 20-të.
“Mund t’ju them se ky është operacioni më i madh ndonjëherë i vendit që synon ‘cangaçon e ditëve të sotme”, tha Brunella.
Bandat e stilit Cangaço kanë qenë përgjegjëse për një seri bastisjesh në Brazil vitet e fundit, shpesh duke synuar bankat në qytetet e mesme në brendësi të shteteve jugore dhe juglindore. Në dhjetor 2020, gangsterët rrethuan qytetin jugor të Criciúma, duke djegur automjete, duke rrëmbyer punonjës të qeverisë, duke hedhur në erë një bankë dhe duke u përfshirë në një betejë dy-orëshe me armë, ndërsa kryebashkiaku iu lut banorëve të qëndronin larg rrugëve.
