Kuvendi i Shqipërisë zhvilloi këtë të martë një seancë të posaçme për të shënuar 100-vjetorin e krijimit të Kontrollit të Lartë të Shtetit, institucioni më i lartë i auditimit të financave publike në vend.
Në seancë morën pjesë diplomatë të huaj të akredituar në Tiranë, mes tyre edhe kreu i delegacionit të Bashkimit Europian në Shqipëri, Silvio Gonzato.
Kryetarja e Kuvendit, Elisa Spiropali, në fjalën e saj përshëndetëse, vuri në dukje rolin e KLSH-së si një aktor kyç në forcimin e transparencës, mirëqeverisjes dhe në rrugën e integrimit të Shqipërisë në Bashkimin Europian.
Ajo theksoi se Kuvendi do të vijojë mbështetjen për KLSH-në si institucion kushtetues, në përpjekje për rritje ekonomike, përmirësim të performancës financiare dhe për përshpejtimin e integrimit europian.
“Procesi i anëtarësimit në BE nuk është thjesht një përmbyllje, por edhe fillimi i një etape të re për institucionet shqiptare në kuadër të familjes europiane”, u shpreh Spiropali, duke nënvizuar rëndësinë e ruajtjes së pavarësisë institucionale si një element thelbësor për demokracinë, së bashku me llogaridhënien dhe transparencën.
Ajo shtoi se bashkëpunimi mes Kuvendit dhe KLSH-së bazohet në tre shtylla: pavarësi, mbështetje dhe partneritet, duke e cilësuar këtë marrëdhënie si thelbësore për rritjen e efikasitetit të mbikëqyrjes parlamentare.
Në përmbyllje, Spiropali shprehu angazhimin e Kuvendit për të thelluar bashkëpunimin me Kontrollin e Lartë të Shtetit në drejtim të forcimit të menaxhimit të financave publike dhe luftës kundër abuzimeve dhe keqmenaxhimit.
