Deputetët e Kuvendit të Kosovës pritet të mblidhen sot për herë të 19-të me radhë, në një tjetër përpjekje për të konstituar legjislaturën e re, ndërsa procesi vazhdon të mbetet i bllokuar për shkak të mospajtimeve rreth zgjedhjes së kryetarit të Kuvendit.
Lëvizja Vetëvendosje këmbëngul në kandidaturën e Albulena Haxhiut për postin e kryeparlamentares, ndërkohë që partitë opozitare PDK, LDK dhe AAK e kanë kundërshtuar hapur këtë propozim, duke e cilësuar si të papranueshëm.
Për të zhbllokuar situatën, në disa nga seancat e fundit, kryesuesi i përkohshëm Avni Dehari ka propozuar krijimin e një komisioni të posaçëm që do të mundësonte votimin e fshehtë për kryetarin e Kuvendit.
Megjithatë, as ky mekanizëm nuk ka funksionuar, për shkak të mungesës së kuorumit.
Zgjedhjet e përgjithshme u mbajtën më 9 shkurt 2025, por më shumë se tre muaj pas votimit, institucionet e reja ende nuk janë krijuar, duke thelluar ngërçin politik dhe institucional në vend.
