Për herë të 26-të radhazi, Kuvendi i Kosovës nuk ka arritur të konstituohet, duke thelluar krizën institucionale që zvarritet që nga zgjedhjet e mbajtura në muajin shkurt. Seanca e fundit, e mbajtur më 4 qershor, përfundoi pa marrëveshje, pasi deputetët sërish refuzuan të formojnë një komision për mbikëqyrjen e votimit të fshehtë për zgjedhjen e kryetarit të ri të Kuvendit.
Kryesuesi i seancës konstituive, Avni Dehari, propozoi që votimi të zhvillohej në mënyrë të fshehtë, pas disa përpjekjeve të pasuksesshme të kandidatit të Lëvizjes Vetëvendosje, Albulena Haxhiu, për të siguruar shumicën e nevojshme prej 61 votash.
Opozita kundërshton procedurën, e çon çështjen në Kushtetuese
Partitë opozitare – Partia Demokratike e Kosovës (PDK), Lidhja Demokratike e Kosovës (LDK), Aleanca për Ardhmërinë e Kosovës (AAK) dhe Lista Serbe – kanë kontestuar ligjshmërinë e votimit të fshehtë dhe kanë dërguar çështjen në Gjykatën Kushtetuese, duke kërkuar edhe masë të përkohshme për pezullimin e seancave deri në një vendim përfundimtar.
Në mungesë të një komisioni mbikëqyrës, seanca e radhës është planifikuar të zhvillohet më 5 qershor, me një afat më të shkurtër prej 24 orësh në vend të 48, për të shmangur përplasjen me festimet e Bajramit.
Qëndrimet mbeten të papajtueshme
Në seancën e fundit, partitë opozitare nuk pranuan të delegojnë përfaqësues për mbikëqyrjen e votimit të fshehtë. PDK dhe AAK kanë theksuar se Albulena Haxhiu nuk është një figurë unifikuese dhe i kanë bërë thirrje LVV-së që të propozojë një emër tjetër për postin e kryetarit të Kuvendit. LDK ka shkuar edhe më tej, duke deklaruar se nuk do të mbështesë asnjë kandidat nga LVV.
Në anën tjetër, LVV, si fituese e zgjedhjeve, mban qëndrimin se ka të drejtën për të propozuar kandidatin dhe ka bërë të qartë se nuk do të tërheqë kandidaturën e Haxhiut, duke theksuar se ajo e meriton këtë pozitë.
Aleanca të reja në horizont?
Saranda Bogujevci nga LVV u shpreh se po pritet vendimi i Gjykatës Kushtetuese dhe se ka deputetë të gatshëm për të votuar pas atij vendimi. Ndërkohë, Faton Peci konfirmoi kontakte me Nismën Socialdemokrate, ku Fatmir Limaj shihet si një partner i mundshëm në krijimin e shumicës parlamentare. Limaj, partia e të cilit ka tri ulëse, theksoi domosdoshmërinë e formimit të institucioneve dhe shprehu optimizëm për zgjidhjen e krizës së zgjatur.
Kuvendi mbetet i bllokuar
Zgjedhja e kryetarit dhe pesë nënkryetarëve të Kuvendit kërkon një shumicë prej 61 votash. Vetëm pas këtij procesi, Kuvendi mund të konsiderohet i konstituuar dhe të nisë procedurat për formimin e Qeverisë së re. Deri atëherë, bllokada institucionale vazhdon.
