Ambasadori i Bashkimit Evropian në Tiranë, Luigi Soreca në një intervistë të gjatë ka treguar se çfarë pret Bashkimi Evropian nga Rama dhe Basha, dy krerët e partive kryesore në vend, me nisjen e sesionit Parlamentar të 10 shtatorit.
Diçka tjetër që është e pritshme nga ky sezon i ri Parlamentar është edhe debate në lidhje me praninë e ish-kryeministrit Sali Berisha, i cili është shpallur “non grata “nga Departamenti Amerikan i Shtetit dhe ndërkombëtarët kanë kërkuar që të mos jetë në Kuvend.
“Unë kam besim se ekipet e reja, Parlamenti në tërësi dhe aktorët jopolitikë, janë të gjithë gati për të ecur përpara, të vetëdijshëm se vetëm duke vepruar kështu mund të sigurojnë arritjen e përparësisë kombëtare dhe ndërpartiake të integrimit të Shqipërisë në BE, duke filluar me Konferencën e parë Ndërqeveritare (IGC) mes BE-së dhe Shqipërisë, që do të shënojë zyrtarisht hapjen e bisedimeve të pranimit”, këtë thotë Luigi Soreca në një intervistë për Panoramën.
Më tej Soreca ka thënë se kryeministri i vendi, Edi Rama ka ofruar bashkëpunim me opozitën dhe se vazhdimisht është përfolur për një bashkëpunim mes dy forcave politike. Më poshtë është një pjesë nga intervista se si e komenton ambasadori Soreca këtë.
Luigi Soreca:
Për BE-në në Shqipëri, dhe për mua personalisht, si Ambasador i BE-së në Shqipëri, ekziston një fakt qendror që përbën burimin kryesor të frymëzimit në punën tonë të përditshme këtu: shumica dërrmuese e popullsisë shqiptare, deri në pothuaj 90%, pavarësisht preferencave të tyre politike, flasin njëzëri për dëshirën e tyre për t’u bashkuar me Bashkimin Europian. Po kështu, të gjitha partitë që janë mandatuar nga qytetarët shqiptarë për të marrë vendet në Parlamentin e ri kanë deklaruar se integrimi në BE është një nga prioritetet e tyre politike. Tani këto parti ndajnë të njëjtën përgjegjësi: ta bëjnë realitet këtë shtysë kaq të madhe popullore për pranimin në BE.
Prandaj, do ta inkurajoja fuqishëm klasën politike të Shqipërisë për të gjetur në procesin e integrimit në BE platformën e natyrshme për një bashkëpunim dhe dialog ndërpartiak për “flamurin blu”. Historia e zgjerimit të BE-së dëshmon për fuqinë transformuese të procesit të integrimit në BE, që kërkon vendosmëri afatgjatë dhe punë të vazhdueshme në ekip të politikanëve, anëtarëve të shoqërisë civile, komunitetit të me dias dhe qytetarëve, duke bashkuar forcat për të çuar përpara të ardhmen e tyre. Integrimi në BE, në këtë kuptim, është jopersonal. Në tërësinë e tij, suksesi i integrimit në BE nuk ka të bëjë me një Kryeministër apo me një politikan të vetëm. Ai ka të bëjë me shoqërinë në tërësi. Për shkak të të qenit në pushtet, partitë qeverisëse mbajnë pjesën kryesore të përgjegjësisë. Sidoqoftë, partitë opozitare në çdo vend kanë po ashtu një përgjegjësi të rëndësishme. BE-ja mbështet fuqimisht dhe punon në mbështetje të bashkëpunimit mes shumicës në pushtet dhe opozitës, si formula e vetme për suksesin e vendit në procesin e integrimit në BE, projekti më i madh kombëtar i Shqipërisë që nga rënia e komunizmit.
