Sipas raporteve të inteligjencës së Ekuadorit dhe Evropës, pasuesi i Klement Rexhepit në Ekuador ishte Dritan Gjika, një tjetër bos shqiptar i grupit kriminal “Kompania Bello”.
Ai dhe Rexhepi jetonin në të njëjtën zonë ekskluzive të Samborondón-it, një nga lagjet më luksoze të Guayaquil.
Mediat venezueliane raportojnë se Gjika zotëronte disa biznese dhe restorante në Guayaquil, të cilat i përdorte si mbulim për trafikun e drogës.
Që nga viti 2020, ai ndërtoi një rrjet të fuqishëm ekonomik dhe politik, duke ngritur një strukturë të sofistikuar për kontrabandën e lëndëve narkotike dhe pastrimin e parave.
Aktivitetet e tij kriminale u mbështetën nga një grup prej dhjetë kompanish gjashtë në Ekuador dhe katër në Spanjë që përfshinin fabrika të kanabisit dhe plantacione bananesh.
Në vitin 2023, emri i Gjikës doli në dritë për shkak të lidhjeve të tij me Rubén Chérrez (i vrarë në nëntor të atij viti) dhe Danilo Carrera, kunati i ish-presidentit të Ekuadorit, Guillermo Lasso.
Carrera u dënua për përfshirje në një rrjet kriminal që lidhej me kontrata të paligjshme në sektorin energjetik.
Pas ekspozimit të aktiviteteve të tij të paligjshme, Gjika u arratis nga Ekuadori, duke shmangur ndjekjen penale.
