Kryeministri i vendit, Edi Rama, në një lidhje me ‘Skype’ për emisionin ‘Open’ ka folur rreth masave të marra nga qeveria dhe gjendjen ku ndodhet vendi ynë pas goditjes nga COVID-19.
I pyetur se sa mund të zgjasë kjo gjendje, Rama tha se askush nuk e di, por tha se jemi vendi i parë në Europë, pas Italisë, që kemi marrë masat e duhura.
‘Për këtë pyetje duhet të përgjigjet ndonjë politikan që jep fall. Unë nuk parashikoj apo jap fall. Unë dua të them se masat e marra ishin të domosdoshme. Ne jemi vendi i parë në Europë pas Italisë që kemi marrë masat e duhura. Askush nuk e di se kur do të mbarojë kjo punë. Duhet të shtrëngojmë dhëmbët, por kjo është situata. Të veprojmë si një trup i vetëm për tu bërë mburojë e sistemit tonë shëndetësor’- tha Rama.
Ai e ka cilësuar edhe një herë ‘luftë’ situatën që po përballet vendi me COVID-19, teksa ritheksoi se masat shtrënguese janë ilaç i këtij virusi, pasi ende nuk ka një ilaç tjetër.
“Sot kancelarja gjermane foli për luftë, Franca, SHBA foli për luftë sepse kjo është një luftë. Njerëzit duhet ta fusin mirë në kokë se në luftë prioriteti është të luftosh armikun dhe të mbrosh jetën. Të gjitha të tjerat janë dytësore. Njerëzit duhet të mësojnë të rrinë në rradhë, distancë nga njeri-tjetri dhe jo të mblidhen të gjithë bashkë te dera. Kjo është pjesë e luftës ndaj armikut që na do dorë për dore në rrugë, nga do të grumbulluar, ndërkohë që ne duhet të bëjmë të kundërtën. Ne nuk duhet të shikojmë a jemi vetëm apo me të tjerë, por të shohim të bëjmë maksimumin për veten tonë. Në këtë luftë të gjitha vendet janë vetëm. Ajo që na takon duke mos qenë Gjermania, Franca, apo Amerika që kanë shumë më tepër mjete financiare të bëjmë të gjitha gjërat e duhura pa asnjë kompromis që rrezikon jetën. Nëse doni vende të tjera mund t’ju them që në Itali mund të dalësh vetëm me qenin”, u shpreh më tej Rama.
Më herët ditën e sotme, presidenti serb, Aleksandër Vuçiç, tha se BE nuk i ndihmon në momente të vështira dhe madje i kërkoi ndihmë Kinës.
Mirëpo, kreu i qeverisë nuk është i të njëjtit mendim, teksa u shpreh se Shqipëria ka vetëm një portë, atë euro-atlantike.
“Jo, nuk ndaj të njëjtin mendim. Presidenti i Serbisë ka tre porta. Ka BE, Kinën dhe Rusinë. Ne kemi vetëm një portë, ajo është porta euro-atlantike. Marrëdhënia me BE dhe SHBA. Presidenti i Serbisë po bën politikë të brendshme duke lavdëruar Kinën në një vend ku shumica e popullsisë nuk e do BE-në. BE-ja nuk do na lërë vetëm, por në strategjinë afatshkurtër jemi vetëm”.- tha Rama.
Kryeministri Rama nuk ka kursyer as opizitën, për të cilën tha se është e papërgjegjshme për deklaratat që ka bërë gjatë kohës së COVID-19.
“Opozita bën poezi, ndërsa qeveria shkruan prozë. Ne jemi për sot dhe mendojmë për nesër, ndërsa opozita nuk shikon për nesër. Opozita prandaj flet çfarë do. Thotë që t’i japim lekë, këtij e atij, të paguajmë këtë e atë, por nëse bëjmë këto do thoshim më mirë ta mbyllim me koronën se sa të humbnim në atë gropën e madhe që mund të ndodhë. Prandaj them që opozita shkruan poezi dhe të shkruar poezi në kohë lufte është papërgjegjshmëri”, u shpreh Rama.
