Ish prokurori i përgjithshëm, Adriatik Llalla është dënuar ditën e sotme me dy vite burg.
Avokati Sokol Hazizaj, ka folur për mediat në lidhje me vendimin e Gjykatës së Apelit të Posaçëm.
Ai ka thënë se kjo çështje është e padrejtë dhe se do ta çojnë deri në Gjykatën e Lartë. Hazizaj nuk ka dhënë asnjë informacion në lidhje me vendndodhjen e Llallës, duke thënë se nuk ka asnjë informacion për spitalin ën të cilin është shtruar. Ai shprehet se nuk ka komunikim për anën shëndetësore të Llallës dhe se komunikon me të vetëm për anën procedurale.
“Jemi me gjykim të padrejtë. Di që Llalla është në spital, kaq di. Unë jam avokati i tij dhe jam këtu, para jush. Gjykata, edhe e Shkallës së Parë, edhe e Apelit, ka bërë copy paste të gjitha veprimet procedurale, asgjë tjetër. Do t’i ndjekim të gjitha hallkat, deri në Gjykatën e Lartë. Nuk e di ku ndodhet Llalla, nuk kam komunikim sa i përket anës shëndetësore të ish-kryeprokurorit, kam komunikim vetëm për anën procedurale”, tha avokati.
Sjellim në vëmendje se Gjykata la në fuqi ditën e sotme vendimin e Gjykatës së Shkallës së Parë, për ish-kryeprokurorin Llalla. Në këtë vendim përfshihet 5 vite heqje të së drejtës për të ushtruar funksione publike si dhe konfiskim të pasurisë.
