Pas daljes nga Gjykata e Posaçme e Shkallës së Parë, Monika Kryemadhi ka reaguar për mediat duke komentuar vendimin e marrë ndaj saj dhe ish-presidentit Ilir Meta, ku masat e sigurimit për të dy u lanë në fuqi.
Ajo ka theksuar se nuk është e habitur nga ky vendim, duke pohuar se ka qenë e parashikueshme që gjykata do të miratonte kërkesat e prokurorisë.
Kryemadhi theksoi se sistemi i drejtësisë është nën presionin e SPAK-ut dhe, sipas saj, çdo gjyqtar që mund të dalë kundër kërkesave të prokurorisë mund të përballet me hetime pasurore. Ajo përmendi se shumë gjyqtarë janë larguar nga sistemi ose janë bërë të pandehur pas vendimeve që nuk janë në favor të pushtetit.
Në lidhje me akuzat që ka bërë ish-bashkëshorti i saj, Ilir Meta, për çështjen e deklarimit të pasurive, Kryemadhi i ka hedhur poshtë ato. Ajo tha se procesi i deklarimit të pasurisë është nul dhe se SPAK ka bërë një keqinterpretim të pagesave, duke sqaruar se Mirza Alibeaj ka paguar për veten e saj dhe që ky informacion është i gabuar.
Kryemadhi gjithashtu hodhi poshtë akuzat që kishin të bënin me marrëdhëniet e saj personale, duke e quajtur të pavërtetë çdo aludim mbi marrëdhënien me Kastriot Ismailajn.
Kryemadhi u pyet nese do kandidojë në zgjedhjet 2025, po ajo u shpreh se nuk ka asnjë dëshirë të kandidojë , por është e angazhuar të sensibilizojë opinionin publik për luftën kundër “Fake News”-ve, të cilat sipas saj janë një kërcënim jo vetëm në media, por edhe në sistemin e drejtësisë.
Kryemadhi shprehu angazhimin për të mos lejuar që njerëzit e gabuar të kandidojnë, duke mbajtur një qëndrim kritik ndaj manipulimeve dhe padrejtësive në politikë dhe drejtësi.
