Situata humanitare në Rripin e Gazës po përkeqësohet me ritme alarmante, ndërsa Kombet e Bashkuara paralajmërojnë për një rritje të ndjeshme të rasteve të kequshqyerjes mes fëmijëve.
Sipas Agjencisë së OKB-së për refugjatët palestinezë, që nga fillimi i vitit 2024 janë kontrolluar mbi 240 mijë fëmijë nën moshën 5 vjeç dhe 1 në 10 ka rezultuar i kequshqyer.
“Në shumë raste, infermierët tanë thonë se kequshqyerjen e kanë parë më parë vetëm në dokumentarë apo libra shkollorë,” deklaroi zëdhënësja Juliette Touma.
Kjo situatë është përkeqësuar ndjeshëm pas rritjes së kufizimeve më 2 mars 2025, duke ndikuar drejtpërdrejt në mungesën e ushqimit, ilaçeve, karburantit dhe materialeve higjienike.
Edhe pse Izraeli hoqi përkohësisht një bllokadë 11-javore më 19 maj, dërgesat humanitare janë ende të pakta dhe të pamjaftueshme.
Në këtë kontekst kritik, ushtria izraelite ka ndaluar tërësisht hyrjen e banorëve palestinezë në detin Mesdhe përgjatë bregdetit të Gazës, një masë që deri tani zbatohej kryesisht ndaj peshkatarëve.
Sipas IDF, ndalimi është pjesë e kufizimeve të sigurisë, por ai ka pasoja të rënda për mijëra qytetarë që detin e kishin të vetmen strehë nga temperaturat përvëluese dhe mungesa e ujit të pastër.
“Jam e uritur, me etje dhe plas nga vapa. Gaza po kalon urinë më të keqe. Deti ishte i vetmi vend që na kishte mbetur,” rrëfen për “Haaretz” Rajaa Qudeih, një nënë 31-vjeçare nga Deir al-Balah, e strehuar në një tendë pranë bregut. “Nëse do na vrasin që shkojmë atje, ndoshta është më e lehtë sesa kjo vdekje e ngadaltë. Por kam frikë për fëmijët.”
Sipas OKB-së, mbi 90% e popullsisë së Gazës është e zhvendosur, duke jetuar në kushte ekstreme, pa ujë të pijshëm, pa energji elektrike dhe me akses minimal në shërbime mjekësore.
Më shumë se 95% e ujit në Gaza është i papijshëm, ndërsa impiantet e trajtimit janë jashtë funksionit. Banorët mbijetojnë me sasi të vogla uji të blera në shishe ose të shpërndara me cisterna.
Peshkatarët janë ndër më të prekurit. Më shumë se 6.000 persona në Gaza e kishin peshkimin si burim jetese para luftës. Sipas shifrave të OKB-së, mbi 210 peshkatarë janë vrarë nga IDF që prej tetorit 2023.
Kufizimet detare ndaj Gazës janë përdorur shpesh nga Izraeli me justifikimin e sigurisë, por për shumë palestinezë, kjo e fundit ishte e vetmja “derë e hapur” për jetë, tani edhe ajo është mbyllur.
Lufta në Gaza nisi më 7 tetor 2023, pas një sulmi të Hamasit në jug të Izraelit, ku humbën jetën rreth 1.200 persona dhe u morën peng 251 të tjerë. Që nga ajo kohë, sipas Ministrisë së Shëndetësisë në Gaza, kanë vdekur mbi 57,680 palestinezë, ndërsa infrastruktura është shkatërruar pothuajse plotësisht dhe mbi 90% e banesave janë të pabanueshme.
Ndërsa temperaturat rriten dhe ndihma humanitare mbetet e kufizuar, rreziku për një katastrofë të plotë humanitare është gjithnjë e më i afërt.
