Kryeministri Edi Rama, në cilësinë e kryesuesit të radhës së presidencës së OSBE-së, ka folur në Këshillin Special të OSBE-së në Vjenë rreth krizës politike bjelloruse.
Si iniciues i këtij takimi, Rama ka theksuar se roli i OSBE-së është që të ndihmojë Bjellorusinë në zgjidhjen e kësaj krize dhe jo të ndërhyjë në çështjet e brendshme të saj.
“OSBE duhet të bëjë atë që duhet për të ndihmuar Bjellorusinë në këtë udhëkryq mjaft të ështirë të tyre. Dhuna është gati të shpërthejë që të kuptohet kjo e vërtetë kaq e thjeshtë. Do të duhet mirëkuptim i ndërsjellë dhe bashkëpunim brenda Bjellorusisë. Roli ynë është që të ndihmojmë që kjo të ndodhë”, ka thënë në takimin e Këshillit Special Rama.
Ndër të tjera kryeministri ka nënvizuar edhe 3 pika të rëndësishme që nuk duhet të shkelen me çdo kusht gjatë kësaj ndërhyrje.
Pjesë nga fjalimi i kryeministrit Rama:
“Sikur të mos kishte mjaftueshëm probleme në botë ashtu siç është pandemia na ka detyruar të gjithëve, por jam i kënaqur që ky takim po zhvillohet. Jam i lumtur që jam në Vjenë, në një Vjenë pa maska.
E kam thirrur këtë takim për të trajtuar zhvillimet në Bjellorusi. Ajo është një prej 56 vendeve tona pjesëmarrëve dhe të mos harrojmë një prej premtimeve themelore për të cilat OSBE ekziston, bashkëpunimi për të gjithë mes nesh.
OSBE duhet të bëjë atë që duhet për të ndihmuar Bjellorusinë në këtë udhëkryq mjaft të vështirë të tyre. Dhuna është gati që të shpërthejë dhe nuk do shumë që të kuptohet kjo e vërtetë kaq e thjeshtë. Do të duhet mirëkuptim i ndërsjellë dhe bashkëpunim brenda Bjellorusisë. Roli ynë është që të ndihmojmë që kjo të ndodhë.
Ne e dimë se sado keq të vijnë gjërat sot na duhet një dialog dhe kjo gjë zgjidhet në Minsk.
Në këtë moment shenjat nuk janë të mira, nuk ka shkëmbim, nuk ka mirëkuptim, aspak dialog dhe të që gjendet një rrugë e përbashkët.
Së pari sado të forta të jenë opinionet nuk na takon ne që të ndërhyjmë mes çështjeve të brendshme midis autoriteteve bjelloruse.
Ne nuk po kërkojmë dhe as nuk duhet të kërkojmë rolin e vjetëruar të ndërmjetësimit midis palëve. Thjesht duam të ndihmojmë Bjellorusinë në këtë situatë të vështirë e cila është njëra prej nesh”, ka thënë në Këshillin Special të OSBE-së, kryeministri Rama.
Kujtojmë se opozita bjelloruse nuk i pranoi zgjedhjet e kontestuara në Bjellorusi, ku fitues doli sërish presidenti prorus Aleksandër Lukashenko. Po ashtu edhe BE nuk i njohu zgjedhjet e Minskut zyrtar.
Presidenti Lukashenko ka që në vitin 1994 që është në këtë post.
Kryeministri Rama, në cilësinë e presidentit të radhës së OSBE-së, së bashku me pasardhësen e tij në këtë post, ministren e jashtme suedeze, Anne Linde, propozuan negociata, ndërmjetësim dhe dialog të OSBE-së në Minsk midis opozitës dhe presidentit Lukashenko, propozim i cili deri më tani është refuzuar nga presidenti bjellorus.
Lukashenko i cilëson dialogun e OSBE-së si ndërhyrje në punët e brendshme. Ndërkohë prej disa javësh Bjellorusia është përfshirë në protesta dhe demonstrata të dhunshme pas zgjedhjeve të kontestuara ku Lukashenko u shpall sërish fitues.
