Krisje në marrëdhëniet Beograd-Moskë, takim i tensionuar mes Vuçiç dhe Grushko

Një krisje e ndjeshme është shfaqur në marrëdhëniet midis Serbisë dhe Rusisë, sipas raportimeve të medias serbe Nova.rs. Ky tension është përshkruar pas një takimi të tensionuar në Beograd midis Presidentit serb Aleksandër Vuçiç dhe zëvendësministrit të Jashtëm rus, Aleksandër Grushko.
Sipas burimeve nga qeveria serbe, Grushko është larguar nga Serbia menjëherë pas takimit me Vuçiçin, i pakënaqur me epilogun e bisedimeve. Raportohet se Grushko anuloi të gjitha angazhimet e tij të mëparshme në Beograd për shkak të përgjigjes së Vuçiçit mbi pyetjen e rusëve lidhur me mënyrën se si armët serbe përfunduan në frontin ukrainas.
Vuçiç, përmes një postimi në Instagram, përshkroi bisedën me Grushkon si “të mirë”, duke falënderuar Rusinë për mbështetjen e saj ndaj Serbisë në lidhje me Rezolutën për Srebrenicën në Kombet e Bashkuara dhe për integritetin territorial të Serbisë. “Një bisedë e mirë me zëvendësministrin e Punëve të Jashtme të Federatës Ruse, Aleksandër Grushka. Marrëdhëniet e përgjithshme dypalëshe ndërmjet Serbisë dhe Federatës Ruse i morëm parasysh dhe i vlerësuam si shumë të mira,” shkroi ai.
Megjithatë, raportet e Nova.rs tregojnë se takimi nuk ishte aq pozitiv sa e përshkruan Vuçiç. Grushko nuk e pranoi argumentin se Serbia nuk ka ndikim se ku përfundojnë armët e saj pas shitjes. Vizita dyditore e Grushkos gjithashtu kaloi pa mbulimin e duhur mediatik, gjë që Rusia e konsideroi si një mungesë respekti, megjithëse Beogradi zyrtar e justifikoi këtë me presionin nga Perëndimi.
Raportimet sugjerojnë gjithashtu se marrëdhënia e Vuçiç me Kremlinin është përkeqësuar. Vuçiç ka tentuar tri herë të kontaktojë presidentin rus Vladimir Putin, por pa sukses. Ky refuzim shihet si një mesazh i qartë nga ana e Moskës për Beogradin.
Pas publikimit të këtyre detajeve nga Nova.rs, Vuçiç reagoi menjëherë, duke e quajtur raportin një “gënjeshtër të zakonshme” dhe duke këmbëngulur se marrëdhëniet e tij me Rusinë mbeten korrekte dhe të qëndrueshme. “Gjithçka që është shkruar është një gënjeshtër e zakonshme. Dua t’i informoj qytetarët se ne kemi marrëdhënie shumë korrekte me Rusinë dhe se nuk kam tentuar asnjëherë të flas me Putinin,” shkroi Vuçiç në Instagram.
Kjo situatë reflekton tensionet e mundshme në aleancën strategjike midis Serbisë dhe Rusisë, dhe efektet e saj mbi politikën rajonale dhe ndërkombëtare mbeten për t’u parë.