Gjatë procesit zgjedhor janë regjistruar 87 kallëzime penale në lidhje me shkelje të dyshuara në të gjithë vendin.
Sipas të dhënave të përditësuara nga prokuroritë pranë gjykatave të juridiksionit të përgjithshëm, janë regjistruar gjithashtu 34 procedime penale dhe janë arrestuar në flagrancë 7 persona për vepra penale që lidhen me zgjedhjet.
Shpërndarja e kallëzimeve dhe burimi i tyre:
Nga 87 kallëzimet, 49 janë referuar nga policia gjyqësore, 15 nga SPAK-u, 9 nga subjekte politike, 11 janë bërë kryesisht dhe 3 janë paraqitur nga qytetarë.
Numri më i lartë i kallëzimeve është regjistruar në Tiranë (21), ndjekur nga Dibra (15), Elbasani (11), Fier (8), Lezha (7), Durrësi dhe Kukësi (nga 4), Saranda (5), Gjirokastra dhe Korça (nga 4), Vlora dhe Shkodra (nga 2), ndërsa Berati ka vetëm një rast.
Procedimet penale:
Janë hapur gjithsej 34 procedime penale për vepra si korrupsion zgjedhor, ndikim i paligjshëm te votuesit apo pengim i votimit.
Elbasani kryeson me 8 procedime.
Në Fier janë regjistruar 5 procedime, në Tiranë 4, në Lezhë 3, Gjirokastër 3, Korçë 2, Dibër 2, Shkodër 2, Sarandë 2, Durrës 1, Kukës 1 dhe Vlorë 1.
Disa nga këto çështje janë deleguar te SPAK-u, përkatësisht 6 kallëzime nga Durrësi, Lezha dhe Dibra, dhe 2 procedime nga Shkodra e Fieri.
Masa ndaj të dyshuarve:
7 persona janë arrestuar në flagrancë: 4 në Tiranë, dhe nga 1 në Fier, Elbasan dhe Lezhë.
Prokuroria e Elbasanit ka dhënë urdhër ndalimi për 4 persona.
Për 12 kallëzime është vendosur mosfillimi i hetimit.
Çështje të dërguara në gjykatë:
Një çështje nga Dibra për nxitje dhune gjatë procesit zgjedhor është dërguar në gjykatë me kërkesë për gjykim.
Ndërkohë, një procedim nga Gjirokastra është dërguar me kërkesë për pushim të çështjes.
Të gjitha kallëzimet e tjera mbeten në fazën e verifikimit paraprak.
