Krijohet partia që pretendon t’i prishë punë PD-së. Myslim Murrizi regjistron zyrtarisht partinë e tij në Gjykatë dhe ka deklaruar se do të konkurroj në çdo qark me lista 100% të hapura.
Sipas njoftimit të deputetit, i cili ka shkuar në Kuvend me listat e Bashës, pas largimit, partia u regjistrua zyrtarisht në Gjykatën e Tiranës me 19 tetor 2020, me nismën e deputetëve Myslim Murrizi, Alban Zeneli, Halit Valteri dhe Arlind Çaçani.
“Tufat e hajdutëve dhe mashtrueseve kanë këmbyer karriget me njëri tjetrin pas 8 vitesh”, shkruan Murrizi.
Postimi i plotë:
“Më datë 19 tetor 2020 u regjistrua zyrtarisht në gjykatën e rrethit gjyqësor Tiranë si Parti Politike. LEVIZJA DEMOKRATIKE SHQIPTARE
Me nismën e 4 deputetëve Myslim Murrizi, Alban Zeneli, Halit Valteri dhe Arlind Çaçani si dhe mbështetur nga 4602 firmëtarë nga çdo qark krijuam një subjekt politik. Ndoshta e para Parti Politike që është krijuar ne 30 vite pluralizëm, pa ish-komunistë, pa ish-sigurimsa dhe spiunë sigurimi, pa na i mbledhur firmat pushteti dhe Parti Politike që nuk është “ shitur” nga njeri kryetar tek kryetari blerës siç ka jo pak të tilla. Ju “kerkojmë “ndjesë atyre që kane programuar, dirigjuar apo strukturuar partitë politike ne post-komunizëm në Shqipëri që nuk i pyetëm dhe nuk ju morëm leje. Ju “ kerkojmë” ndjesë edhe ish- funksionareve të lartë të PPSH dhe bashkëpunëtorëve të Ramiz Alisë që Partia Lëvizja Demokratike Shqiptare nuk është pjellë e tyre. Ftojmë çdo Shqiptar që nuk mërzitet nga ky fakt, t’i bashkohet LEVIZJES DEMOKRATIKE SHQIPTARE për të ndikuar me fuqinë e VOTES në 25 prill 2021 për një politikë ndryshe. Partia Lëvizja Demokratike Shqiptare do të konkurrojë në çdo qark vetëm me LISTA 100% TE HAPURA. Nga vota e qytetarëve do të marrë mandat AI ose AJO kanididat që merr një votë më shumë se kolegët e tjerë në listë”.
Njoftimi vazhdon me programin e partisë, që nis me fjalët “Betejë me 5 hajduët dhe hipokritët…”, duke iu referuar liderëve të tranzicionit shqiptar.
/Gazeta Reforma.com/
