Me lajmin tronditës për ndarjen nga jeta të Papa Françeskut të hënën në mëngjes, një figurë jo shumë e njohur për publikun ndërkombëtar doli në skenë: Kardinali irlandez-amerikan Kevin Farrell, i cili njoftoi se Papa ishte “kthyer në shtëpinë e Atit”.
Por përveç këtij njoftimi, Farrell mori mbi supe një prej detyrave më të rëndësishme në Selinë e Shenjtë atë të Camerlengo-s, roli që e vendos përkohësisht në krye të Vatikanit deri në zgjedhjen e Papës së ri.
Ky pozicion i është besuar nga vetë Papa Françesku në vitin 2019, dhe përfshin jo vetëm administrimin e përditshëm të Vatikanit gjatë periudhës “Sede Vacante” (kur posti i Papës është vakant), por edhe drejtimin e organizimit të ceremonive mortore dhe procesit që çon në zgjedhjen e pasardhësit të Françeskut.
Kush është Kevin Farrell?
I lindur në Dublin më 1947, Farrell ka ndjekur studime teologjike në Universitetin e Salamankës në Spanjë dhe në Universitetin Papnor Gregorian në Romë.
Karriera e tij është shtrirë në disa kontinente nga Meksika ku shërbeu si kapelan, deri në SHBA ku ka kaluar mbi 30 vite në shërbim të Kishës, përfshirë edhe si peshkop i Dallasit nga viti 2007.
Në vitin 2016, Papa Françesku e ftoi në Vatikan për të drejtuar dikasterin e sapokrijuar për Laikët, Familjen dhe Jetën, ndërsa në vitin 2023 ai e emëroi edhe president të Gjykatës së Lartë të Shtetit të Qytetit të Vatikanit dhe kryetar të Komisionit për Çështje Konfidenciale.
Përveç ceremonive mortore, Farrell do të udhëheqë edhe përgatitjet për konklavën, ku kolegji i kardinalëve do të zgjedhë Papën e ri. Në histori, dy camerlengo janë bërë edhe vetë papë një mundësi që, ndonëse e rrallë, mbetet gjithnjë e hapur.
Ceremonia e vendosjes së trupit të Papa Françeskut në Bazilikën e Shën Pjetrit pritet të zhvillohet të mërkurën në mëngjes, ndërsa bota katolike i kushton homazhet e fundit një prej figurave më të dashura të kohëve moderne.
