Kolegji i Posaçëm i Apelimit ka vendosur shkarkimin nga detyra të gjyqtares së Tiranës, Ardiana Bera, duke rrëzuar vendimin e një viti më parë të Komisionit të Pavarur të Kualifikimit, i cili e kishte konfirmuar atë në detyrë.
Vendimi u mor nga trupa gjykuese e KPA-së e përbërë nga Rezarta Schuetz (kryesuese), Mimoza Tasi (relatore), si dhe anëtarët Albana Shtylla, Natasha Mulaj dhe Sokol Çomo.
Ardiana Bera ka nisur karrierën si gjyqtare në vitin 1997 në Gjykatën e Rrethit Gjyqësor Krujë, për t’u transferuar më pas në vitin 2010 në Gjykatën e Tiranës.
Ajo është bërë e njohur për publikun nga çështja kundër oficerëve të Gardës së Republikës, Ndrea Prendi dhe Agim Llupi, të akuzuar për vrasjen e protestuesve më 21 janar 2011.
