Kolegji i Posaçëm i Apelimit ka lënë në fuqi vendimin e Komisionit të Pavarur të Kualifikimit për të konfirmuar në detyrë, Petrit Çanon, i cili aktualisht mban postin e drejtuesit të Prokurorisë së Krujës. Vendimi vjen pas një përballjeje më 14 shtator të këtij viti në KPA mes Komisionerit Publik, Florian Ballhysa, i cili ankimoi vendimin e Komisionit të Pavarur të Kualifikimit për konfirmim e Çanos në tetor të vitit 2019. KPA mori vendim për të rrëzuar pretendimet e ngritura nga Komisioneri Publik Florjan Ballhysa ndaj prokurorit të Krujës Petrit Çano, duke i cilësuar ato të pambështetura në prova.
Trupa e KPA-sw me kryesuese Rezarta Schuetz, relatore Ina Rama, anëtarë Albana Shtylla, Sokol Çomo dhe Ardian Hajdari, vendosi të lërë në fuqi vendimin e Komisionit të Pavarur të Kualifikimit për të lënë në detyrë Çanon.
Njoftim vendimi
Trupi gjykues i Kolegjit të Posaçëm të Apelimit, i përbërë nga Rezarta Schuetz kryesuese, Ina Rama relatore, Albana Shtylla, Ardian Hajdari, Sokol Çomo anëtarë, shpalli vendimin për çështjen (JR) nr. 53/2019, datë 25.10.2019, që i përket ankimit të paraqitur nga Komisionerit Publik kundër vendimit të Komisionit të Pavarur të Kualifikimit nr. 183, datë 19.07.2019, që lidhet me subjektin e rivlerësimit Petrit Çano.
Në përfundim të gjykimit, trupi gjykues, bazuar në nenin 66, pika 1, shkronja “a” e ligjit nr.84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, në mënyrë unanime, vendosi:
- Lënien në fuqi të vendimit të Komisionit të Pavarur të Kualifikimit nr. 183, datë 19.07.2019 që i përket subjektit të rivlerësimit Petrit Çano.
- Ky vendim është përfundimtar dhe ka efekt të menjëhershëm.
Çano u konfirmua nga Komisioni i Pavarur i Kualifikimit në 19 korrik 2019, por vendimi u apelua nga Komisioneri Publik Florian Ballhysa në tetor të atij viti. Prej prillit 2021 deri këtë të martë Kolegji zhvilloi një duzinë seancash, gjatë të cilave u paraqitën ndër të tjera edhe denoncime shtesë dhe një raport i ri negativ nga Drejtoria e Sigurimit të Informacionit të Klasifikuar ndaj Çanos i cili nuk u mor në konsideratë. Kujtojmë se ishte paraqitur edhe një denoncim i ri ndaj Çanos, i depozituar pranë Operacionit Ndërkombëtar të Monitorimit, ONM, i cili u trajtua gjatë seancës publike më 30 korrik. Komisioneri Publik evidentoi atëherë se denoncimi ishte i njëjti, për të cilin me parë Kolegji ka vendosur të mos e shqyrtojë për shkak se nuk përmbush kriteret.
Por pasi dëgjoi pretendimet e palëve kryesisht sa i përket pasurisë dhe profesionalizmit dhe vlerësoi më vete raportin e DSIK-së, i cili mbetet i klasifikuar si sekret shtetërorë, Kolegji gjeti se Çano duhej të qëndronte në detyrë.
Kolegji rrëzoi fillimisht pretendimin e Ballhysës se në tërësi Çano kishte cënuar besimin e publikut te drejtësia. Ndërsa Schuetz lexoi se pretendimet në lidhje me fiktivitetin e çmimit për dy apartamente nuk qëndronin, duke iu referuar kohës së blerjes dhe po ashtu kontratave të ngjashme.
KPA rrëzoi edhe pretendimin për paligjshmëri të një shumë prej 600 mijë lekësh përfituar nga likuidimi i biznesit të bashkëshortes së prokurorit dhe arsyetoi se deklarimi i tij i pasurisë ishte i besueshëm.
Schuetz lexoi se pas hetimit nga vetë trupa e KPA vendimi i DSIK-së për të shpallur Çanon si të papërshtatshëm ishte i pabazuar. Sipas KPA ndryshimi i raportit nga ana e DSIK-së nga përshtatshmëri në papërshtatshmëri ishte bërë mbi të dhëna të paverifikuara nga vetë organi ligjzbatues dhe jashtë kontekstit të verifikimit të figurës bazuar në ligjet për procesin e vetingut.
Njëkohësisht KPA rrëzoi pretendimet e Komisionerit Publik se Çano si drejtues, prokuroria duhej të mbante përgjegjësi në lidhje me vendimet e prokurorëve vartës në rastet e disa lirimeve të diskutueshme të burgosurve për krime të rënda. KPA tha se nuk u gjetën raste të veçanta mbi të cilat të hetohej sjella e Çanos.
Vetë Çano në mbrojtje të tij pati vënë në dukje se rastet që kishin sjellë edhe debat publik ishin apeluar prej prokurorisë që ai drejtonte. Kolegji u shpreh se të dhënat e paraqitura nuk bënin të mundur arritjen e përfundimeve mbi mënyrën se si Çano kishte ushtruar detyrën e tij.
