Zyra e Rregullatorit për Energji ka miratuar më 16 prill tarifat e reja të energjisë elektrike, të cilat do të hyjnë në fuqi nga data 1 maj dhe parashikojnë një rritje prej 16.1% krahasuar me vitin e kaluar.
Megjithëse vendimi është marrë, ZRRE ende nuk ka bërë publike çmimet e reja të kilovatit për konsumatorët familjarë dhe ata të sektorit të biznesit.
Tarifat e energjisë rishikohen çdo vit nga ZRRE, duke hyrë në fuqi më 1 prill dhe duke qenë të vlefshme deri më 31 mars të vitit pasues. Këtë vit, rritja e çmimit pason miratimin e kërkesave për të hyrat maksimale të lejuara nga tre operatorët kryesorë të sektorit energjetik: KOSTT (Operatori i Sistemit, Transmisionit dhe Tregut), KEDS (Distribuimi) dhe KESCO (Furnizimi).
Këto kompani kanë kërkuar rritjen e tarifave, duke argumentuar se kostot janë rritur si rezultat i nevojës për import të energjisë elektrike.
Aktualisht, konsumatorët familjarë që shpenzojnë deri në 800 kilovatë në muaj paguajnë 7.79 centë për kilovat, ndërsa për konsumin mbi këtë nivel, çmimi rritet në 14.45 centë. Gjatë orëve të natës (22:00 – 07:00), çmimi është 3.34 centë për shpenzimet nën 800 kWh dhe 6.81 centë për pjesën mbi këtë kufi.
Miratimi i rritjes së tarifave ka nxitur reagime të shumta. Më 11 prill, në ditën kur u miratuan kërkesat e operatorëve, qytetarë dhe aktivistë protestuan në Prishtinë kundër shtrenjtimit të energjisë. Kundërshtime ka pasur edhe nga përfaqësues të bizneseve, të cilët paralajmërojnë se ky vendim mund të shkaktojë rritje të përgjithshme të çmimeve në treg./ REL
