Pas skandalit të mishit të pulës së kontaminuar me salmonelë në Shqipëri, autoritetet në Kosovë kanë shtuar masat për të garantuar sigurinë ushqimore.
Zëdhënësi i Agjencisë së Ushqimit dhe Veterinarisë (AUV), Lamir Thaçi, deklaroi se janë ndërmarrë kontrolle të shtuara në kufi dhe brenda vendit për të eliminuar çdo dyshim në lidhje me mishin me origjinë nga Brazili.
“Janë realizuar kontrolle të rrepta në pikat kufitare dhe brenda vendit. Deri tani, nuk kemi asnjë provë që mish i tillë të jetë lidhur me rastin në Shqipëri”, tha Thaçi.
Sipas tij, që nga lëshimi i urdhëresës për kontrolle shtesë, në Kosovë kanë hyrë shtatë ngarkesa me mish pule nga Brazili. Për secilën ngarkesë janë marrë mostra për analizë, ndërsa sasia është bllokuar përkohësisht derisa të dalin rezultatet laboratorike.
Përveç kësaj, janë kryer dy inspektime në pika shitjeje dhe është kontrolluar edhe depoja e kompanisë importuese. Edhe aty është marrë mostër për testim, dhe është vendosur ndalimi i përkohshëm për nxjerrjen në treg të produktit të dyshuar.
“Mostrat janë në laborator dhe po analizohen. Nuk mund të caktojmë një datë të saktë për përfundimin e analizave, pasi kjo varet nga dinamika e punës në laborator. Sapo të kemi rezultate, do ta informojmë publikun menjëherë,” shtoi zëdhënësi i AUV-së.
Thaçi theksoi se kontrollet do të vazhdojnë në mënyrë të pandërprerë dhe se Kosova është e përgatitur të reagojë në çdo situatë që mund të paraqesë rrezik për sigurinë ushqimore.
Ai siguroi se të gjitha masat po ndërmerren për të mbrojtur shëndetin e konsumatorëve dhe për të larguar çdo dyshim nga produktet që importohen.
