Kosova ka bllokuar importimin e deleve dhe dhive nga Shqipëria, pas konfirmimit të shpërthimit të murtajës së bagëtive të imta në Qarkun e Dibrës. Sëmundja, e njohur si Peste des Petits Ruminants, ka vënë në lëvizje autoritetet veterinare, të cilat kanë marrë masa të menjëhershme për të parandaluar depërtimin e saj në territorin e Kosovës.
Agjencia e Ushqimit dhe Veterinarisë u ka kërkuar komunave në zonat kufitare të zbatojnë kufizime të rrepta për lëvizjen e bagëtive në kullotat pranë vijës kufitare. Paralelisht, fermerëve u është bërë thirrje që të mbajnë nën vëzhgim të vazhdueshëm tufat e tyre dhe të shmangin çdo kontakt me kafshë që vijnë nga territori shqiptar.
Sipas njoftimit zyrtar, kontrollet do të forcohen në të gjitha pikat kufitare dhe në zonat përreth, me qëllim frenimin e çdo rreziku për përhapjen e sëmundjes. Autoriteti u ka bërë apel fermerëve që të tregojnë kujdes të shtuar, të shmangin lëvizjet e panevojshme të bagëtive, të raportojnë menjëherë çdo shenjë të dyshimtë te veterineri dhe të kufizojnë kontaktet me kafshë të tjera.
Po ashtu, rekomandohet që të mos blihen kafshë pa u verifikuar më parë gjendja e tyre shëndetësore dhe të forcohen masat e biosigurisë në ferma. Autoritetet sqarojnë se kjo sëmundje nuk transmetohet te njerëzit dhe nuk përbën rrezik për shëndetin publik.
