Qeveria e Kosovës ka miratuar një vendim për pranimin e 50 emigrantëve të dëbuar nga Shtetet e Bashkuara të Amerikës.
Kryeministri Albin Kurti bëri të ditur këtë zhvillim përmes një njoftimi në rrjetet sociale, ku theksoi se kjo masë është pjesë e një bashkëpunimi të ngushtë me autoritetet amerikane.
Sipas Kurtit, emigrantët që do të pranohen gjatë vitit do të përzgjidhen mbi bazën e kritereve që lidhen me respektimin e ligjit dhe sigurinë publike.
Ai theksoi se Kosova mbetet një aleat i qëndrueshëm dhe i besueshëm i SHBA-së, dhe se ky vendim është një dëshmi konkrete e kësaj aleance.
Ky është një hap që forcon marrëdhëniet mes Prishtinës dhe Uashingtonit, ndërsa autoritetet kosovare theksojnë se bashkëpunimi me SHBA-në mbetet një prioritet strategjik për vendin.
Reagimi i plotë i Kurtit
“Si përgjigje ndaj kërkesës së Shteteve të Bashkuara të Amerikës për pranimin dhe zhvendosjen e përkohshme të shtetasve të vendeve të treta, gatishmërinë e shprehur për bashkëpunim me partnerin dhe aleatin tonë, sot e përkthyem në Vendim të Qeverisë, në mbledhjen tonë të 262-të.
Sipas këtij vendimi, shteti ynë brenda një periudhe njëvjeçare do të pranojë dhe strehojë deri në 50 individë me qëllim të lehtësimit të kthimit të tyre të sigurt në vendin e prejardhjes.
Përzgjedhja e këtyre personave do të bëhet nga një listë e propozuar, për aq sa ata i plotësojnë kriteret e caktuara lidhur me sundimin e ligjit dhe rendin publik.
Gjatë qëndrimit të tyre në Kosovë, këta persona do të veprojnë në përputhje me legjislacionin në fuqi dhe do të gëzojnë të drejtat e përcaktuara po sipas legjislacionit tonë në fuqi.
Shtetet e Bashkuara të Amerikës mbeten aleat i yni palëkundur dhe Republika e Kosovës do të jetë gjithmonë partner i besueshëm i tyre.
U jemi përherë mirënjohës për ndihmën dhe bashkëpunimin e vazhdueshëm, dhe e vlerësojmë lartë mbështetjen në mbrojtje e zhvillim, e sidomos në rrugëtimin tonë drejt integrimit Euro-Atlantik”, shkruan Kurti.
Po ashtu qeveria e Kosovës miratoi dhe vendimin për ti kërkuar Presidentes së Republikës së Kosovës dhënien e autorizimit për nënshkrimin e Marrëveshjes Kornizë për Bashkëpunim në Fushën e Mbrojtjes ndërmjet Republikës së Kosovës, e përfaqësuar nga Ministria e Mbrojtjes dhe Shteteve të Bashkuara të Amerikës, e përfaqësuar nga Departamenti i Mbrojtjes;
